جو بايډن او شي جين پينګ د چهارشنبې ورځ د لړم په ۲۴مه نېټه په سانفرانسيسکو کې سره وکتل. په دې غونډه کې، د امریکا او چین مشرانو هوکړه وکړه چې "پوځي اړېکې" بیا پیل کړي او د نشه یي توکو پر ضد سیاستونو کې به همکاري وکړي.
شي جين پينګ چې له شپږو کلونو وروسته امريکا ته تللی، له خپل امريکايي انډول سره يې څلور ساعته خبرې اترې وکړې.
چین د تېر کال په اګست میاشت کې تایوان ته د امریکا د استازو جرګې د هغه وخت د مشرې د سفر په غبرګون کې له امریکا سره خپل پوځي اړېکې پرې کړل.
د نشه يي توکو پر وړاندې د مبارزې په برخه کې د چين او امريکا مشرانو هوکړه وکړه چې د افيوني فينتانيل د سرچينې په اړه چې په امريکا کې په پراخه کچه کارول کېږي، د مبارزې په برخه کې همکاري وکړي. یوه امریکايي چارواکي ویلي، چې د دغې هوکړې له مخې به چین د هغو کیمیاوي شرکتونو پسې پلټنه وکړي، چې پخوا يې دغه توکي تولید کړي و.
رویټرز د یوه امریکايي چارواکي له خولې ویلي چې د چین ولسمشر د تایوان په اړه د خپل هېواد نیت روښانه کړی او ویلي یې دي چې چین د تایوان پر ضد د پوځي اقدام کوم پلان نه لري.
جو بایډن هم له شي جین پینګ څخه وغوښتل چې د تایوان د ټاکنو بهیر ته درناوی وکړي.
د متحده ایالاتو ولسمشر دا هم وویل چې امریکا او چین باید دا ډاډ ترلاسه کړي چې د دوی سیالي په "نښتو" نه بدلیږي او خپلې اړیکې به په "مسؤلیت" سره اداره کوي. ښاغلي بایډن وویل چې د اقلیم بدلون، د نشه یي توکو پر ضد مبارزه او د مصنوعي ځیرکتیا اړوند مسایل د چین او امریکا ګډې پاملرنې ته اړتیا لري.
په پام کې ده چې د چین ولسمشر نن د اسیا – ارام سمندر د اقتصادي همکاریو په غونډه کې ګډون وکړی.
