دوه ورځې وړاندې فلای دوبۍ د شاوخوا دوه کاله ځنډ وروسته یو ځلې بیا افغانستان ته خپلې الوتنې له سره پیل کړې. په دوبۍ کې د طالبانو تر واک لاندې د افغانستان قونسلګرۍ ویلي، چې د اېر عربیه هوايي شرکت چارواکو ډاډ ورکړی چې کابل ته د الوتنو لپاره هوډمن دي.
دغه قونسلګرۍ ویلي، چې دا مهال دوی په کابل کې د هوايي چلند له چارواکو سره په مشورو لګیا دي چې کابل ته د اېر عربیه د الوتنو د پیلولو په اړه وروستۍ پرېکړې ته ورسېږي.
د دغو هوايي شرکتونو د الوتنو له پیلولو سره داسې هیلې هم راټوکېدلي، چې د افغانستان او نورو هېوادونو تر منځ الوتنې به د کورنیو هوايي شرکتونو له انحصاره ووځي چې په دې سره به هم د ټکټونو په بیو کې کمښت راشي او هم به د خلکو د انتظار شېبې رالنډې شي.
فلای دوبۍ د جمهوریت پر مهال هم له متحدو عربي اماراتو افغانستان ته الوتنې درلودې؛ خو د ۲۰۲۱ کال له اګست راهیسې د نورو ټولو بهرنیو هوايي شرکتونو په څېر دغه شرکت هم افغانستان ته الوتنې درولې وې.
د جمهوریت پر مهال پر فلای دوبۍ سربېره د امارات، ترکش، عربیه، اېر انډیا، پيایاې او د ایران د اسمان په ګډون بېلابېلو بهرنیو هوايي شرکتونو افغانستان ته الوتنې کولې.
