د ګډ امنیتي تړون سازمان: طالبان د افغانستان پر وضعیت بشپړ کنټرول نه لري
د ګډو امنیتي تړونونو د سازمان لوی درستیز اعلان وکړ, چې طالبان لا هم د افغانستان پر وضعیت بشپړ کنټرول نه لري. جنرال اناتولي سېدروف زیاته کړه، چې د ګډ امنیتي تړون سازمان د افغانستان له خاورې د ترهګرو د ګواښ د مخنیوي لپاره تابیاوې نیسي.
نوموړي په مسکو کې د پنجشنبې په ورځ (د لړم په ۲۵ مه) په یوې خبري غونډه کې وویل: «تر اوسه پورې له افغانستانه کوم پوځي ګواښ نه شته؛ خو ورته مهال موږ پوهېږو چې د افغانستان اوسنی مشرتابه لا هم د دغه هېواد پر وضعیت بشپړ کنټرول نه لري.»
جنرال اناتولي سېدروف د دې پوښتنې په ځواب کې چې ایا افغانستان لا هم د ډلهییز امنیت د تړون د سازمان د غړو هېوادونو لپاره ترهګریز ګواښ ګڼل کېږي او که نه؟ وويل: «د افغانستان په شمالي سيمو کې چې د ګډ امنيتي تړون د سازمان له غړو هېوادونو سره پوله لري، ځانګړي اقدامونه د ترسره کېدو په حال کې دي.»
د ګډو امنیتي تړونونو د سازمان لوی درستیز د دغه سازمان د اقدامونو په اړه جزیيات ورنکړل.
نوموړي د خپلو خبرو په یوه بله برخه کې وویل، چې له افغانستانه د نشهیي توکو د قاچاق ستونزه لا هم شته.
ارمنستان، بلاروس، قزاقستان، قرغزستان، روسیه او تاجکستان د ګډ امنیتي تړون د سازمان غړي دي او په تېرو دوو کلونو کې یې د افغانستان پولې ته څېرمه څو ګډ پوځي تمرینونه کړي دي.
