د کرېکټ یو ورځنیو سیالیو نړیوال جام پای لوبه نن یک شنبه د (لړم ۲۸مه) د کوربه هیواد هند او اسټرالیا لوبډلو تر منځ ترسره کیږي. د کرېکټ ۲۰۲۳م کال نړیوال جام د اتلولۍ برخلیک ټاکونکې دا پای لوبه د هند د احمداباد په نریندرا مودي لوبغالي کې د کابل په وخت د ماسپښین یوه بجه ترسره کیږي.
له پای لوبې یوه ورځ مخکې د دواړو هیوادونو لوبډلمشرانو د نړیوالو اتلولیو له جام سره ګډ انځورونه واخیستل او په یوه خبري غونډه کې يې ګډون وکړ.
د هند لوبډلمشر روهیت شرما د پای لوبې فشار د پاملرنې وړ مسله وبلله خو وايي لوبډله یې چې تر دې دمه څنګه لوبېدلې، نن هم د یوې ښې لوبې تمه ترې کیږي.
د اسټرالیا لوبډلمشر پټ کیومنز وویل، لوبډله یې د پای لوبې له پاره په بشپړ ډول چمتو ده. او هیله یې وښوده چې د ډیرو نندارچیانو په شتون کې به د سیالې لوبډلې ماتول بېل خوند ولري.
تر دې مهاله ۱۲ځله د کرېکټ د یو ورځینو سیالیو د اتلولۍ نړیوال جام سیالۍ ترسره شوې دي.
د یو ورځینو سیالیو په تاریخ کې اسټرالیا پنځه ځله د کرېکټ د یو ورځیو سیالیو نړیوال جام ګټلی دی.
هند بیا دوه ځله دغه کارنامه په خپل نوم ثبت کړې او د دریم ځل ګټلو له پاره نن یو ځل بیا خپل بخت ازمايي.
د کرېکټ د ۲۰۲۳م کال نړیوال جام سیالیو کې تر دې دمه هند خورا پیاوړې لوبډله ده.
دغې لوبډلې خپلې لس پرله پسې لوبې له کومې ماتې پرته په لویو لویو توپیرونو وګټلې.
خو اسټرالیا په ګروپي لوبو کې له هند او سوېلي افریقا څخه په دوو ماتو خوړلو اته سیالۍ ګټلې دي.
سچن ټنډولکر له خپلې مېرمنې سره د لوبې لیدو ته راغلي و او کولي له ریکارډ ماتولو وروسته سچن ته د درنښت په پار سر او لاسونه ټیټ کړل.
کولي دغه ریکارډ د نننۍ لوبې په ۴۲ اور کې چې د نوي زیلنډ لاکي فیرګوسن توپ اچونه کوله مات کړ.
د کرېکت په روان نړیوال جام کې دا د کولي دریمه سلیزه ده. د دې ټورنمنټ په پیل کې یې د بنګلدیش او سویلي افریقا پر وړاندې هم سلیزې وهلې وې.
کولي په یو ورځنيو کرېکټ لوبو کې خپل نړیوال سفر له ۲۰۰۸ میلادي کال څخه پیل کړ او خپله لومړۍ سلیزه یې د ۲۰۰۹ میلادي کال په ډسمبر کې د خپل هېواد په کلکته کې د سریلانکا پر وړاندې ووهله.
دویمه سلیزه یې هم په میرپور کې د بنګلدیش پر وړاندې وهلې وه.
کولي په ۲۹۱ نړیوالو یو ورځنیو لوبو کې ۵۰ سلیزې او ۷۱ پنځوسیزې کړې دي.
تر کولي مخکې سچن ټنډولکر په ۴۶۳ یو ورځنیو لوبو کې ۴۹ سلیزې او ۹۶ نیمه سلیزې وهلې وې.
د کولي تر څنګ هندي توپ وهونکي روهیت شرما په روان نړیوال جام کې د شپږیزو ریکارډ مات کړ.
ویرات کولي نړیوال جام کې د سلیزو شمېر پنځوسو او روهیت شرما د شپږیزو شمېر پنځوسو ته ورساوه.