د طالبانو اقتصاد وزارت د افغانستان د اقتصادي وضعیت په اړه د امریکا د سولې انستیتیوت راپور ردوي او بې بنسټه یې بولي. د امریکا د سولې انستیتیوت د نړیوال بانک د راپورونو په ارزولو سره ویلي، چې د افغانستان اقتصاد له ځوړ سره مخ دی او د کډوالو ستنېدو سره به یې ستونزې لا ډېرې شي.
خو د طالبانو اقتصاد وزارت د یکشنبې په ورځ په یوه خبرپاڼه کې وايي، چې افغانستان په تېرو دوو کلونو کې د اقتصاد په برخه کې پام وړ پرمختګ او لاسته راوړنې لري.
طالبانو «د انفلاسیون د کچې کنټرول، د افغانیو ثبات ساتل، د ملي عوایدو او صادراتو زیاتوالی او د پراختیایي پروژو تمویل» د افغانستان د اقتصاد د پرمختګ لاملونه بللي دي.
دې وروستیو کې افغانۍ د ډالر په مقابل کې خورا زیات ارزښت پیدا کړی، خو له دې سره په بازار کې د توکو بیې د پخوا په څېر لوړې دي.
همدارنګه د طالبانو په واکمنۍ کې ورځ تر بلې د افغانانو بې کاري زیاتېږي او هم یې بشري مرستو تکیا ډېرېږي.
له پاکستانه د افغان کډولو ستنېدل او د هرات زلزله هغه دوه نوي لاملونه دي چې په افغانستان کې یې نړیوالو مرستو ته لا اړتیا ډېره کړې ده.
د امریکا د سولې انسټیټیوټ هم د نړیوال بانک د تېرې اونۍ د دوو راپورونو په ارزولو سره پرون ویلي: د افغانستان اقتصاد له ځواړ سره مخ دی، ورځ تر بلې پکې بې کاري زیاتېږي او افغانان د خپلو لومړنیو توکو د اخیستلو وس نه لري.
افغانستان انټرنشنل ـ پښتو ته نن یکشنبه د ( لړم ۲۸ مه ) څو سرچینو وویل چې په هالند کې د روغتیا نړيوال سازمان له ناستې وروسته طالبانو د خوړو او درملو ادارې مشر شاوخوا دوه اوونۍ د اروپا په یو شمیر هیوادونو کې ګرځیدلی او د خپلې ډلې لپاره یې سیاسي حرکتونه کړي دي.
د جرمني په کولن کې د نوموړي تر څرګندونو وروسته جرمن چارواکو د نوموړي په ورتګ بې خبري وښوده او ویې ویل، چې په دې هکله پلټنې کوي.
ور پسې د هالنډ د روغتیا وزیر هم له نوموړي سره د روغتیا نړيوال سازمان غونډه کې په انځور اخیستو بښنه وغوښته او ویې ویل چې نوموړی یې نه پېژاند.
خو افغانستان انټرنشنل ته په دغه غونډه کې د عبدالباري عمر رسېدلی کارت ښيي چې دغه طالب چارواکي د افغانستان د خوړو او درملو ادارې په استازیتوب په دغه غونډه کې کډون کړی دی.
عبدالباري عمر تېره ورځ ولیکل چې «هالنډ، بلجیم، سلواکیا او جرمني ته مې سفرونه کړي او اوس هم اروپا کې یم او له ګڼو افغانانو په شمول افغان ډېپلوماټانو او سفیرانو سره مې لیدلي دي. »
په بېلجیم کې د افغانستان سفیر نظیف الله سالارزي ته نژدې سرچېنې وویل چې د طالبانو د خوړو او درملو ادارې مشر عبدالباري عمر څو ځله پېغامونه استولي چې دی غواړي ورسره ناسته وکړي خو نظیف الله سالارزي د دغه طالب چارواکي غوښتنه رد کړې او ورسره یې نه دي لیدلي.
په هالند کې د افغانستان سفیر اصف رحیمي چې له دې وړاندې هم ویلي و چې له طالبانو سره تعامل لري، له دغه طالب چارواکي سره په څو ځایونو کې لیدل شوی دی.
د افغانستان انټرنشنل ـ پښتو موندنې ښه يي چې اصف رحیمي له ګڼو افغان ډیپلوماټونو او افغانانو سره تماسونه نیولي او هڅه یې کړې چې له دغه طالب چارواکي لپاره د ناستو زمینه برابره کړي.
سرچینې زیاتوي چک جمهوریت، اسپانیا او هالند کې د افغانستان سفارت ځینو ډیپلوماټو له دغه طالب چارواکي سره له نژدې ناستې کړې دي.
په اروپايي هیوادونو کې دغه طالب چارواکي یو شمیر افغان ټولنو ته په خپله داسې پېغامونه استولي چې ګواکې د طالبانو د رهبر ملا هبت الله پیغام یې له ځان سره راوړی دی او غواړي چې دغه پېغام ور سره شریک کړي.
په هالند کې یو افغان چې له دغه طالب چارواکي سره ناسته کړې او ادعا کوي چې د عبدالباري عمر پاسپورټ یې په خپلو سترګو لیدلی وویل، چې ښاغلی عمر افغان پاسپورټ او د اروپا شینګین ویزه لري.
ځینو ډیپلوماټیکو سرچینو وویل چې د عبدالباري عمر د سفر جنجالي کېدو وروسته د اروپايي هیوادونو بهرنیو چارو وزارتونه په حرکت راغلي دي.
دوی د افغانستان د سفارتونو مسوولینو ته ویلي چې له دې وروسته دوی نشي کولی طالب چارواکو سره په دغو هیوادونو کې ناستې وکړي او یا هم غونډې ته یې دعوت کړي هغه په دې دلیل چې دغه هیوادونه تر اوسه پورې د طالبانو حکومت په رسمیت نه پيژني.
عبدالباري عمر په یو شمیر ناستو او لیدونکو کې داسې څرګندونې کړي چې د اروپا مېشتو یو شمیر کسانو توجو یې ځانته اړولې ده.
یو شمیر کسانو چې له غه طالب چارواکي سره لیدلي افغانستان انټرنشنل ـ پشتو ته وویل چې عبدالباري عمر په ځینو شخصي او عمومي غونډو کې د نجونو د تعلیم او کار ملاتړ کړی او په خپلو څرګندونو کې یې ټینکار کړی چې دا بندیز لنډمهاله دی.
د دغه طالب چارواکي بله نیوکه دا وه چې د طالبانو په دولتي ادارو کې باید وړ او مسکلي کسان وګومارل شي.
د جرمني په کولن ښار کې د کونړر کلتوري ټولنې په نوښت غونډه کې د نوموړي تر څرګندونو وروسته دا سفر خواله رسنیو کې لاس په لاس شو او د اروپايي چارواکو غبرګون یې وپاراوه.
د کونړ کلتوري ټولنه کې ځینو سرچینو وویل چې دوی د وروستیو نانداریو په اړه ناسته لري او په دې اړه تمه شته چې د غبرګون ښودلو لپاره اعلامیه خپره کړي.
دوی زیاتوي د ترکي ټولنې په ودانۍ کې دا ناسته د طالبانو د خوړو او درملو ادارې د مشر په غوښتنه دوی له دې ټولنې د ټاکلي وخت لپاره جوړه کړې وه.
اروپا ته طالبانو د خوړو او درملو ادارې مشر سفر هغه وخت غبرګونونه راپارول چې د جرمني کولن ښار کې د کونړ کلتوري ټولنې په کوربتوب یې په یوه غونډه کې وینا وکړه.
د جرمني د کورنیو او بهرنیو چارو وزارتونو ترڅنګ د هالند روغتیا وزارت ددغه طالب چارواکي سفر ته غبرګون ښودلی او دا یې غندلی دی او ویلي دي چې دوي به ددغه طالب چارواکي سفر وڅیړي.