په یوه نوي راپور کې، د ملګرو ملتونو د چاپیریال پروګرام د هیوادونو د اقلیم د ژمنو پلي کولو په ارزښت ټینګار کړی. د دغه سازمان په راپور کې راغلي چې که هېوادونه اقلیمي ګامونو ته پام و نه کړي، نو د ځمکې تودوخې درجه به له ۲.۵ تر ۳ سانتي ګراد ته لوړه شي.
د ملګرو ملتونو د چاپېریال ساتنې پروګرام دغه راپور د دوشنبې په ورځ (د لړم ۲۹مه) خپور کړ او د ځمکې د راتلونکي په اړه یې خبرداری ورکړ
د دغه سازمان په راپور کې ویل شوي چې د ځمکې د تودوخې درجې د ۱.۵ درجو ته راښکته کولو له پاره، اړینه ده چې د شین کوړیزو ګازونو خپرول ۴۲ سلنه کم شي.
د ملګرو ملتونو د چاپېریال ساتنې پروګرام چارواکو د هېوادونو له خوا د پاکې انرژۍ پر کارولو او د ډبرو سکرو پر ځای د یوې نوې انرژۍ د کارولو پر پراختیا ټینګار کړی دی.
په دغه راپور کې، ساینس پوهانو وړاندوینه کړې چې د ځمکې د تودوخې تر ۳ درجو پورې زیاتوالی به، د کنګلونو د ویلې کولو او د امازون ځنګلونو وچیدو په ګډون یو ستر اقلیمي ناورین او نه جبرانېدونکی حالت رامنځته کړي.
دا راپور په دوبۍ ښار کې د ملګرو ملتونو د اقلیم د بدلون له کنفرانس څخه څو اونۍ مخکې خپور شو چې د لیندۍ له ۱۶ څخه تر ۲۱ پورې به جوړیږي.
په دغه کنفرانس کې ګډون کوونکي هغه غړي دي چې په ۱۹۹۲ کال کې د اقلیم بدلون په اړه یې د ملګرو ملتونو کنوانسیون لاسلیک کړی دی.
