د هلمند صرافۍ مارکېټ یو صراف افغانستان انټرنشنل- پښتو ته وویل، چې د طالبانو استخباراتو په مرکز لښکرګاه کې د کلدارو د حوالو پر سر د صرافۍ مارکېټ بند کړی او ۲۰ تنه صرافان يې بنديان کړې دي.
طالبانو په ټول افغانستان کې د بهرنیو هېوادونو د پولي واحدونو پر کارونې بندیز اعلان کړی دی.
د هلمند د صرافۍ مارکېټ یو صراف افغانستان انټرنشنل- پښتو ته نن سې شنبه ( د لیندۍ ۷ مه) په يوه لېږلې غږیز پيغام کې وویل، چې د طالبانو ورته ویلي؛ د صرافيو حوالې دې بندې کړي او د پاکستانۍ کلدارې د استعمال هم منع اعلان شوی.
ددې صراف د معلوماتو له مخې؛ د سويل لوېديځې حوزې د سوداګرو ډېره راکړه - ورکړه د پاکستان هېواد سره ده او د کلدارو د حوالو پر مطلق بندېدو به خلک له سخت مالي زيان سره مخ شي.
ددې مارکېټ صرافان وايي، چې د کلدارو د حوالو په بندېدو دوی مجبوريږي، چې پاکستان ته ډالر حواله کړي او په دې سره دوی درې برابره زيان ويني.
صرافان په ښار کې د کلدارو د راکړې - ورکړې د بندېدو هر کلی کوي؛ خو د حوالو د لېږد بندېدل د سوداګرو او د افغانيو د رالوېدو په زيان بولي.
د هلمند د لښکرګاه د صرافۍ مارکیټ دا مهال په بشپړ ډول بند دی او د طالبانو د استخباراتو ریاست له لوري پرې وسله وال کسان ولاړ دي، چې هېڅ کس ته د تګ - راتګ اجازه نه ورکوي.
د یادونې وړ ده، چې له تېرو څلورو ورځو راپه دې خوا په کندهار کې هم طالبانو د صرافۍ په مارکېټ کې د کلدارو حوالې او پاکستانۍ کلدارې بندې کړې دي.