په کراچۍ کې د افغان سوداګرو د ایسارو کانټینرونو برخلیک لاهم څرګند نه دی

د افغانستان د سوداګرۍ خونه وايي، سره له دې چې د پاکستاني چارواکو سره په کراچۍ بندر کې د ایسارو شویو کانټینرونو د خوشې کولو پر سر هوکړه شوې وه؛ خو لا هم د افغان سوداګرو سوداګریز توکي هلته ایسار پاتې دي.

د افغانستان او پاکستان د سوداګرۍ د ګډې خونې مشر خانجان الکوزي افغانستان انټرنشنل پښتو ته وویل: «شاوخوا دوه اوونۍ وړاندې موږ په اسلام اباد کې د افغانستان د سوداګریزو توکو پر خلاصون خبرې اترې کړې وې. هغوی ژمنه کړې وه، چې ۳۶۰۰ کانټینره به بې له قید او شرطه پرېښودل کېږي او هغه نور شپږ سوه کانټینره چې بند دي، هغه به بېرته واردېدونکو هېوادونو ته ستنول کېږي؛ خو د لسو ورځو په تېرېدو سره لا هم د افغان سوداګرو مالونه په کراچۍ بندر کې ایسار پاتې دي.»
څه کم دوه اوونۍ وړاندې د طالبانو د سوداګرۍ وزیر په مشرۍ یو پلاوی اسلام اباد ته تللی و او هغه مهال داسې راپورونه خپاره شوي و، چې ایسار کړل شوي سوداګریز توکی به ډېر ژر خوشې کېږي؛ خو لا هم د دغو سوداګریزو کانټینرونو برخلیک جوت شوی نه دی.
دا رنګه د افغانستان د سوداګرۍ خونې دا اندېښنه هم په ډاګه کړې وه، چې پر دغو ایسارو سوداګریزو توکو هره ورځ مالیه او جریمه راځي او داسې وېرې هم په ډاګه شوې وې، چې ښايي د دغو توکو له بیو څخه پر هغو د جریمو او مالیې پیسې زیاتې شي.
افغان سوداګر وايي، په دغو سوداګریزو توکو کې داسې توکي هم شته چې ښايي د وخت په تېرېدو سره په دغو کانټینرونو کې بار توکي بېلابیل دي؛ ځينو ته یې زیات زیانونه اوښتي او ځینو ته کم او په دې کې داسې مالونه هم شته که دې نور هم ځنډېږی ښايي تر ټاکلې نېټې واړوي، چې بیا به له کارولو وړ نه وي.
له بله پلوه د چمن او بولدک د دروازې له بندېدو وروسته د وچې او تازه میوې صادرات هم ځنډېدلي او سوداګر مجبور دي، چې د تورخم له لارې خپل صادراتي توکي ولېږدوي چې دا هم خلکو ته په زیان دي.