د پاکستان د بهرنیو چارو وزارت ویانده وايي، پاکستان چې د طالبانو له حکومت کومه تمه درلوده، هغه ترلاسه نه شوه او دا ډېره «مایوسوونکې» ده.
ممتاز زهرا بلوڅ زیاتوي، پاکستان له ټي ټي پي سره د جدي معاملې لپاره د طالبانو له حکومته ناهیلی شوی، خو بیا هم هڅه کوي چې طالب چارواکي قانع کړي.
ممتاز زهرا بلوچ د جمعې په ورځ په اسلام اباد خبري غونډه کې زیاته کړه چې له دې سره بیا هم د پاکستان او طالبانو ترمنځ خبرې د «ارتباطي چینلونو» له لارې روانې دي.
د پاکستان د ډان ورځپاڼې د راپور له مخې مېرمن بلوڅ وویل، افغان طالبانو د پاکستان طالبانو تحریک د ګواښ له منځه وړلو لپاره «ځانګړي تضمینونه» ورکړي دي.
د هغې په خبره: «د طالبانو له چارواکو زموږ غوښتنو ته په کتو، موږ ته خاص تضمینونه راکړل شوي دي. موږ اوس لیوال یو چې د ټي ټي پي په وړاندې اغېزناک اقدام په عمل کې وګورو.»
د پاکستان د بهرنیو چارو وزارت ویاندې د طالبانو د تضمینونو په اړه جزییات نه دي ورکړي.
پاکستان تل طالبان په دې تورن کړي چې د پاکستان تحریک طالبان ته یې پناه ورکړې او له دغې ډلې یې د ټي ټي پي پر وړاندې د جدي اقدام غوښتنه کړې ده.
په دې وروستیو کې د خیبر پښتونخوا په بنو کې د پاکستان د امنیتي ځواکونو پر کاروان د پاکستاني طالبانو له برید وروسته د پاکستان د بهرنیو چارو وزارت په اسلام اباد کې د طالبانو سفیر احضار کړ.
پاکستاني چارواکو په وار وار ویلي چې تحریک طالبان پاکستان د طالبانو تر ولکې لاندې افغانستان کې پناه اخیستې او هلته روزل کیږي او د پاکستان په خاوره کې ترهګریز فعالیتونه کوي.
په تېرو میاشتو کې پاکستان په افغانستان کې د تحریک طالبان پاکستان پر ضد ځینې بریدونه کړي دي.
له بلې خوا طالب چارواکو ویلي دي چې پاکستان د خپل امنیت په تامین کې پاتې راغلی، «خپلې ستونزې د افغانانو پر اوږو اچوي.»
طالبان او پاکستان سره نږدې اړیکې لري. پاکستان د طالبانو له ملاتړو هېوادونو څخه بلل کیږي، خو په دغه هېواد کې د ناامنیو د زیاتېدو له امله له طالبانو سره د اسلام اباد اړیکې په تېره بیا په وروستیو میاشتو کې ترینګلې شوې او د طالبانو او پاکستاني چارواکو ترمنځ ناندرۍ زیاتې شوې دي.
له بلې خوا د افغانستان او پاکستان طالبان هم سره نږدې اړیکې لري. په افغانستان کې د طالبانو له واکمنۍ سره سم پاکستاني طالبانو د پاکستاني پوځ پر ضد خپلو بریدونو ته زور ورکړی دی.