د طالبانو د بهرنیو چارو وزارت پر غزې د اسراییل د بریدونو بیا پیلېدو ته په غبرګون کی ویلي، په فلسطین کې د «قتل عام» دوام به د نړیوالو سازمانونو او بشري حقونو د کنوانسیونونو «کمزوری» اعتبار هم له منځه یوسي. دغه وزارت له نړيوالې ټولنې وغوښتل چې د فلسطينيانو د وژنې مخه ونيسي.
د طالبانو د بهرنیو چارو وزارت ویاند په اېکس کې د یوې اعلامیې په خپرولو سره پر غزې د اسراییل تازه بریدونه غندلي او د نړۍ له هېوادونو او د بشري حقونو له سازمانونو یې غوښتي چې په غزه او فلسطین کې د روان قتل عام مخه ونیسي.
د طالبانو د بهرنیو چارو وزارت په دې اعلامیه کې پر غزې د اسراییل د بریدونو د سملاسي بندېدو او دې مسالې ته د اساسي حل غوښتنه کړې ده.
د اسراییل او حماس تر منځ له اووه ورځني اوربند وروسته د جمعې له سهار راهیسې د اسراییل جنګي الوتکو یو ځل بیا پر غزې بمبار پیل کړی، چې لسګونه کسان پکې وژل شوي او ټپیان دي.
اسراییلي پوځ او حماس په عین وخت کې یو بل د اوربند له موافقې څخه په سرغړونې تورنوي.
پر غزې د اسراییل په بریدونو کې تر اوسه له ۱۵ زره ډېر فلسطینیان وژل شوي دي.
د اسراييل دا بريدونه د اکټوبر په اوومه د حماس له خوا د اسراييل پر جنوبي سيمو د بريد په ځواب کې دي، چې په ترڅ کې يې ١٢٠٠ اسراييليان ووژل شول او تر ٢٠٠ ډېر کسان يرغمل شول.
