باوري سرچینې: طالبانو کابل کې د ولسي جرګې د پخوانۍ غړې کور وسوځاوه

AP ۱۴۰۲ لیندۍ ۱۶

کره سرچینو افغانستان انټرنشنل ته وویل، طالبانو د کابل په وزیر اکبر خان کې د افغانستان د پخوانۍ ولسي جرګې د غړې شکیلا هاشمي کور وسوځاوه.

دغه کور د وزیر اکبر خان په ۱۷ سړک کې د هغه مېلمستون په ګاونډ کې و چې د القاعده مشر ایمن ظواهري پکې اوسېده.

امریکا د ۲۰۲۲ کال په اګسټ کې د طالبانو د کورنیو چارو وزیر تر واک لاندې په همدغه مېلمستون کې ښاغلی ظواهري وواژه.

باوري سرچینو افغانستان انټرنشنل ته وویل، د ۲۰۲۱ کال په اګسټ کې د طالبانو په واکمنېدو پسې د دې ډلې کسانو پرلپسې پر شکیلا هاشمي زور اچاوه چې دا کور پر دوی وپلوري.

خو مېرمن هاشمي د دې فشار په مقابل کې ودرېده.

د سرچینو په خبره، طالبانو په تېرو دوو کلونو کې د دې کور پر اوسېدونکو پراخ بندیزونه لګولي وو او ان ورته ویل یې چې د کور بام او پاس منزلونو ته به هم نه خېږي.

د سرچینو په خبره، دا چې مېرمن هاشمي د طالبانو فشار ته تسلیم نه شوه او کور یې ور نه کړ، نو دوی هم نن اور ورته کړ.

افغانستان انټرنشنل ته رسېدلو ویډیوګانو کې هم له اور وروسته کور ښکاري.

سرچینې وايي، مېرمن هاشمي په کابل کې بل کور هم لري او هغه هم «طالبانو غصب کړی دی.»

طالبانو لا په دې هکله څه نه دي ویلي.

شکیلا هاشمي د افغانستان د ولسي جرګې په ۱۵ او ۱۶ دوره کې د لوګر د خلکو استازې وه.

هغه په شپاړسمه دوره کې د ملي اقتصاد کمېسون غړې هم وه.

نور خبرونه

رادیو

ستاسو د غږ لپاره کور

خپل فلمونه او غږونه را ولېږئ