د طالبانو کډوالو او راستنېدونکو چارو وزارت په اېکس پاڼه لیکلي، چې د چهار شنبې په ورځ د (لیندۍ ۱۵مه) د کندهار سپین بولدک له لارې سل کورنۍ افغانستان ته راستنې شوې دي. د یاد وزارت په خبره د راستنو شویو کورنیو د غړو شمېر چې ۵۷۷ تنو ته رسیږي ټول یې په زور له پاکستانه اېستل شوي دي.
د طالبانو کډوالو او راستنېدونکو چارو وزارت وايي، ۱۱۴ هغه افغانان چې د پاکستان د بېلابیلو ښارونو په زندانونو کې بندیان وو، هم تېره ورځ د سپین بولدک - چمن په دروازه افغانستان ته سپارل شوي.
پاکستان تر دې وړاندې هم د دغه هیواد په زندانونو کې بندې افغانان افغانستان ته سپارلي وو.
د بشري حقونو فعاله منزه کاکړ وايي، لاهم لسګونه افغانان د پاکستان په زندانونو کې بندیان دي.
نوموړې وایی: «همدا زما دنده ده چې د افغان بندیانو قضیې په محکمو کې په موقت ډول پر مخ وړم، ډیر کسان دلته د قانوني اسنادو د نشتوالي له امله بندیان دي. په بندیانو کې ښځې او ماشومان هم شته. او اوس هم د پاکستان په بېلابیلو ښارونو کې لسګونه افغانان بندیان دي.»
له پاکستانه د افغان کډوالو د اېستلو لړۍ څه باندې یوه میاشت وړاندې پیل شوې او د دغه هیواد چارواکي وایي د راتلونکي کال تر لومړۍ میاشتې به څه باندې یو میلیون افغان کډوال له پاکستانه وباسي.
