د پاکستان پخواني لومړي وزیر عمران خان چې دا مهال په زندان کې دی ویلي، چې افغان کډوالو سره روان چلند، د اسلام دین او د پاکستاني فرهنګ خلاف کار دی. نوموړي له حکومته د کډوالو د ایستلو د بهیر د درولو غوښتنه کړې ده.
د پاکستان پخواني لومړي وزیر عمران خان له زندانه په خپور کړي ځانګړي پیغام کې ویلي، چې له افغان کډوالو سره روان چلند، د اسلام دین، د خدای د کتاب، د پیغمبرو له سنت او د پاکستاني فرهنګ سره په ټکر کې دی.
هغه ویلي، چې کډوالي په اسلام کې یو لوړ مقام لري او د اسلام د پیغمبر په ګډون ګڼ شمېر پیغمبران د خپل ماموریت د بشپړولو لپاره کډوال شوي دي.
هغه زیاته کړې: “هغه کسان چې د جنګ او نورو ستونزو له امله کډوالۍ ته مجبور شوي، د هغوی سره ښه چلند او د هغوی درناوی پر مونږ فرض دی”.
د نوموړي په وینا؛ پاکستان او افغانستان دوه اسلامي وروڼه هېوادونه دي او د دواړو هېوادونو د خلکو ترمنځ اړیکې ډېرې پخوانۍ دي.
هغه په دې باور دی، چې هیڅوک خپل ګاوڼډي نه شي بدلولی او د ګاوڼډیو تل یو بل ته اړتیا وي او بل دا چې پاکستان د یوې خوندي راتلونکې لپاره دا ضروري ده چې دغه هېواد خپلو ګاوڼډیانو سره ښې اړیکې ولري.
عمران خان ویلي، چې پاکستان له څلویښتو کلونو راهیسې د افغان کډوالو کوربه توب کړی دی؛ خو د حکومت اوسنۍ کړنې د کلونو - کلونو د غه خواري ضایع کوي.
هغه دا هم ویلي چې پاکستان ۲۵۰ میلیونه نفوس لري او ۱.۵ میلیونه کډوال پر دغه هېواد کوم بوج نه راولي.
هغه ویلي، چې په پاکستان کې دېره افغان کډوال تر ټولو بې وسه خلک دي او دوی سره د حکومت منفي چلند، د پاکستان په اړه د افغانانو په منځ کې منفي غبرګونونه راپارولي دي.
نوموړي له حکومته غوښتي چې د کډوالو د ایستلو روان بهیر ودروي او د افغان کډوالو د وضعیت لپاره دې یوه ابرومندانه لاره چاره پیدا کړي.
