د ایران سر کونسل:‌ د ویزې ورکړه کې اسانتیا راتلو سره دې افغانان له بې قانونه سفر ډډه وکړي

AP ۱۴۰۲ لیندۍ ۱۸

په مزارشريف كې د ايران اسلامي جمهوريت سر کونسل دغه هېواد ته د افغانانو په قانوني سفر ټینګار وکړ.

سيد حسن يحيوي یوې غونډې ته وویل، د ایران اسلامي جمهوریت په ځانګړې توګه د بهرنیو چارو وزارت افغانانو ته د ویزو په ورکولو کې ښې اسانتیاوې برابرې کړې دي.

د ایران دولتي رسنۍ صدا و سیما د نني راپور له مخې، په مزار شریف د ایران جنرال کونسل د سیاحتي شرکتونو له استازو سره په لیدنه کې زیاته کړه، باید مطمین شو چې ایران ته قانوني سفر کوونکي خپل هیواد ته بېرته ستنیږي.

د صدا و سیما په دغه راپور کې راغلي چې په افغانستان کې د ایران سفارت او جنرال کونسلګریو په ځانګړې توګه په مزارشریف ښار کې د زیارت او سیاحت لپاره د ویزو د ثبت او صادرولو لپاره د یو سیستم په رامنځته کولو افغان غوښتونکو ته د ویزو ورکولو بهیر چټک او اسان کړی دی.

په دغه راپور کې لیکل شوي دي چې دا اسانتیاوې ایران ته د افغانانو د غیر قانوني او له خطر ډکو سفرونو د مخنیوي په هدف برابرې شوې دي.

په افغانستان کې د طالبانو واکمنۍ پیلېدو سره ډیری افغانان د بې کارۍ له امله ګاونډیو هیوادونو په ځانګړي ډول ایران ته له قانوني اسنادو پرته او په بېلابیلو قاچاقي لارو مرګوني سفرونه کوي.

خو په ایران کې په دې وروستیو کې د افغان کډوالو خلاف ولسي تاوتریخوالی ډېر شوی او حکومت یې هم ستنولو ته مجبوروي.

د ایران امنیتي چارواکو پرون هم وویل، چې په تېره یوه اونۍ کې تر ۱۳ زرو ډېر کډوال افغانستان ته ستانه کړل شول.

نور خبرونه

رادیو

ستاسو د غږ لپاره کور

خپل فلمونه او غږونه را ولېږئ