د بشري مرستو نړۍوالو ادارو ویلي، چې د پراخې لوږې تر څنګ په غزه کې عامه نظم د ویجاړېدو په درشل کې دی. خو په همدې حال کې اسراییل د دوشنبې په ورځ، دغه تورونه رد کړل چې ګواکې دوی غواړی د دغې سیمې خلک دې مصر ته وشړي.
د خوړو د نړۍوال پروګرام اجراییوي مرستیال کارل اسکایو وویل، چې د غزې نیمايي وګړي په لوږه کې ژوند تېروي.
یو فلسطیني رویټرز ته ویلي، له تېرو درېیو ورځو یې خواړه نه دی خوړلي او دې ته اړ شوی چې د بچیانو له پاره د خوړو پیدا کولو په پار خیر ټول کړی.
هغه وايي، غواړی د خپلو بچیانو له پاره ځواکمن او پیاوړی پاتې شي؛ خو وېره یې دا ده چې دغه ځواک یې اوبه نه شي.
د ملګرو ملتونو عمومي منشي انتونیو گوترش د یکشنبې په ورځ ویلي و، د هغه اندېښنه دا ده چې خلک به په ډلهییزه توګه مصر ته وکوچېږي او د فلسطیني بې ځایه شویو خلکو له پاره د مرستندویه ټولنې مشر فیلیپ لازاریني وايي، چې د غزې خلک د مصر پر لورې شړل کېږي.
اردن هم پر اسراییل تور پورې کړی، چې غواړي «غزه له خلکو تشه کړي.»؛ خو اسراییل دغه تور رد کړی او هغه یې «شرموونکی او سپکوونکی» عمل بللی.
مصر لا له وړاندې خبرداری ورکړی و، چې خپلې خاورې ته به د غزې خلکو ته د ورتګ اجازه نه ورکوي، ځکه داسې وېرې شته چې په دې توګه به هغوی خپلو اصلي سیمو ته بېرته نه ستنېږي.
د ملګرو ملتونو چارواکی وايي، ۱.۹ مېلیونه خلک ( د غزې ۸۵ سلنه خلک) بېځایه شوي او په سویلي سیمو کې شرایط «جهنمي یا دوزخي» شرایط دي.
