د اسلام اباد د ترهګرۍ ضد محکمې د پښتون ژغورنې غورځنګ مشر منظور پښتین ضمانت منظور کړی دی. محکمې د نوموړي پر ضد په دوو قضیو کې د ضمانت درخواست منظور کړی دی؛ خو دا لا روښانه نه ده، چې هغه به خوشې شي او که په نورو قضیو کې به ونيول شي.
د نوموړي وکیل مصدق عزيز خټک رسنيو ته ويلي، د اسلام اباد د ترهګرۍ ضد محکمې د پښتين په دوو قضیو کې ضمانتونه منظور کړل؛ خو که په بله قضیه کې یې ګرفتاري ښکاره نه کړل شوه نن يا سبا به خوشې شي.
نږدې یوه میاشت وشوه، چې منظور پښتین د ډسمبر په څلورمه په چمن کې د پولیسو لهخوا ونیول شو.
منظور احمد پښتین د چمن په پرلت کې تر وینا وروسته، د بلوچستان ایالت تربت سیمې ته د تلو پر مهال د پولیسو له لورې ونیول شو.
د منظور پښتین پر موټریز کاروان لومړی د پولیسو له لورې ډزې شوې وې او وروسته یې نوموړی ونیو او له ځان سره یې یووړ.
