په سوریه کې د سپاه پاسداران د قوماندان رضي موسوي له وژل کېدو وروسته د ایران ولسمشر ابراهیم رییسي اسراییل ته ګواښ وکړ او ویې ویل: «بې له شکه دا ناوړه عمل په سیمه کې د دغه رژیم د بې وسۍ او کمزورۍ یوه بله نښه ده او ارو مرو به د دغه جنایت تاوان ورکړي.»
د ایران دولتي رسنیو د دوشنبې په ورځ اعلان وکړ چې د سوریې په پلازمېنه دمشق کې د اسراییل په یوه هوايي برید کې د ایران سپاه پاسداران یو جګپوړی سلاکار وژل شوی دی.
امنیتي سرچینو رویټرز ته ویلي، سید رضي موسوي د ایران او سوریې تر منځ د پوځي همغږۍ مسوول و.
المیادین خبری آژانس له دمشق څخه خبر ورکړی چې «سید رضي د دښمن د دریو توغندیو په برید کې ووژل شو.»
ایران ویلي دي په تېرو کلونو کې څو ځله د اسراییل له لوري د موسوي د وژلو هڅې شوې دي. د ایراني رسنیو په وینا، سید رضي موسوي د سوریې په جګړه کې د ملاتړ په ټولو پړاوونو کې ګډون کړی و.
