یوه پوځي چارواکي د دوشنبې په ورځ وویل، د هند پوځ د هند تر ولکې لاندې کشمیر کې د پوځ په توقیف کې د درېیو ملکي وګړو د وژنې په اړه څېړنې پیل کړې او خپل جګپوړي افسران یې له دغې لانجمنې سیمې لېږدولي دي.
د سیمې اوسېدونکو ویلي، امنیتي سرتېرو ولسي وګړي وروسته له هغه د پوښتنو ګروېږنو لپاره نیولي وو چې د پنجشنبې په ورځ وسلهوالو د هندي پوځیانو پر موټرو برید وکړ او څلور پوځیان یې ووژل.
د جمو او کشمیر د پونچ ولسوالۍ په ځنګلونو کې دغه برید په وروستیو میاشتو کې پر هندي سرتېرو پنځم لوی برید و، چې په کې ۲۴ امنیتي سرتېري ووژل شول.
د پاکستان د بهرنیو چارو وزارت په یوه بیان کې ویلي، پاکستان د ملکي وګړو وژنه "په کلکه غندي".
د محمد صديق په نامه د پونج اوسېدونکي وويل، د جمعې په ورځ هندي ځواکونو د ده د ٢٦ کلن وراره په ګډون نهه کسان د پوښتنو ګروېږنو لپاره نيولي دي.
هغه وویل:« یو له دوی څخه خوشې شوی او اته نور ربړول شوي او زما د وراره شوکت احمد په ګډون درې تنه وژل شوي دي.»
