د شمالي کوریا مشر د خپل هیواد پوځ، د وسلو صنعت او اټومي وسلو برخې ته امر کړی چې د «د متحده ایالاتو د بې ساري خوځښتونو د مخنیوي لپاره» د جګړې چمتووالی ګړندی کړي. کیم جونګ اون وویل چې هیواد به یې په نوي کال کې د «امپریالیزم ضد» هیوادونو سره ستراتیژیکې همکارۍ پراخې کړي.
د شمالي کوریا د دولتي خبري اژانس د راپور له مخې، کیم جونګ اون دغه څرګندونې د چهارشنبې په ورځ د دغه هېواد د واکمن ګوند په یوه غونډه کې وکړې.
په داسې حال کې چې امریکا د اوکراین په جګړه کې د کارولو لپاره مسکو ته د پوځي تجهیزاتو په ورکولو تورنوي، شمالي کوریا له روسیې سره خپلې اړیکې زیاتې کړي دي.
د دې همکارۍ پر بنسټ، روسیه هم له تخنیکي پلوه د کوریا د پوځي وړتیاوو په پراختیا کې مرسته کوي.
کیم جونګ اون هم راتلونکی کال د شمالي کوریا د اقتصادي موخو د ترلاسه کولو لپاره «ټاکوونکی» بللی او «د لوړې کچې کرنیزو تولیداتو د برابرولو» غوښتنه یې کړې ده.
شمالي کوریا په وروستیو لسیزو کې د خوراکي توکو له سخت کمښت سره مخ ده، چې دغه کمښت اکثر د طبیعي پېښو په پایله کې رامنځ ته شوی. کارپوهان په دې باور دي چې د کورنا وبا پر مهال د دغه هیواد د پولو تړلو دا وضعیت نور هم مخ په ځوړ کړی.
