رویټرز خبري اژانس راپور ورکړی، چې د اسلامي دولت ډلې (داعش) په ایران کې د قاسم سلیماني د تلین په مراسمو کې د بریدونو مسوولیت پر غاړه اخیستی دی. په یاده پېښه کې له سلو زیات کسان وژل شوي او اسلامي دولت ډلې په ټېلګرام کې د یادو چاودنو مسوولیت منلی دی.
د ایران په کرمان ښار کې د دوو غبرګو چاودنو له امله ایراني چارواکي وایي، چې لږ تر لږه ۱۰۳ تنه مړه او ۱۷۰ نور ټپیان شوي دي.
دغه چاودنې د سپاه پاسداران د قدس ځواکونو د پخواني قوماندان قاسم سلیماني د مړینې د څلورم تلین د یاد غونډې څېرمه شوې دي.
د راپورونو له مخې؛ دغه چاودنې د قاسم سلیماني د ښخولو ځای «ګلزار شهدای کرمان» ته څېرمه شوې دي.
تسنیم خبري اژانس د کرمان د روغتونونو له قوله ویلي، چې په دغو غبرګو چاودنو کې ۱۰۳ تنه مړه او د ټپیانو شمېر هم ۱۷۱ ته رسېدلی دی؛ خو کېدای شي دغه شمېرې نورې هم لوړې شي.
په ورته وخت کې د ایران یو شمېر چارواکو ویلي، چې د دغو چاودنو سخت غچ به واخلي.
