د پخواني ولسمشر حامد کرزي د دفتر پخوانی مشر عبدالکریم خُرم د ایران په کرمان ولایت کې د تېرې ورځې د ځانمرګو بریدونو په غبرګون ویلي، چې د اسراییل لومړی وزیر بنیامین نتنیاهو غواړي په سیمه کې جګړه لاپسې وغځوي او ایران پکې ښکیل کړي.
ښاغلي خُرم په خپله اېکس پاڼه کې په کرمان کې د بې ګناه خلکو وژل کېدل ستر او د نه بخښولو وړ جنایت بللی او همدا راز یې لیکلي؛ اسراییل سره له دې چې د امریکا پوځي مرستو پورې تړلی دی، اذربایجان ته هم وسلې ورکوي.
نوموړی وایي: "نتنیاهو د غزې د خلکو په قتل عام سره غواړي په سیمه کې جګړه وغځوي او ایران پکې ښکیل کړي."
د پخواني ولسمشر حامد کرزي د دفتر پخوانی رییس زیاتوي؛ نتنیاهو چې له څه مودې راهیسې ټاکل شو؛ د فساد په تړاو محاکمه شي، اوس د ناسمو سیاستونو له امله د اکټوبر د اوومې نېټې په پېښې هم تورن شوی دی.
خُرم وایي، چې بنیامین نتنیاهو د ځان د بقاء لپاره د هرې ورځې په تېرېدو سره انسانان وژني.
د ایران په کرمان ولایت کې د چهارشنبې په ورځ د قاسم سلیماني د څلورم تلین په لمانځونډه کې ځانمرګي بریدونه چې د لسګونو ملکي کسانو د وژل کیدو لامل شو، له پراخو غبرګونونو سره مخ شوی دی.
سره له دې چې تراوسه هیڅ یوې ډلې ددغو بریدونو مسوولیت پر غاړه نه دی اخیستی، خو اسراییل په دې بریدونو کې په لاس لرلو تورن شوی دی.
اسراییل بیا دا تورونه ردوي.
