د اسلام اباد ځانګړي قاضي د جنجالي ټویټونو په قضیه کې د منظور پښتين د ضمانت غوښتنه منلې ده. د قضیې د اوريدنې پر مهال د منظور پښتين وکيل عطاالله کنډي وويل، په قضیه کې علي وزیر هم ښکېل دی چې اوسمهال خوشې شوى دى.
د ترهګرۍ ضد محکمې په دوو نورو قضیو کې هم د ښاغلي پښتین ضمانت منظور کړى دى؛خو لاهم هغه له بنده خوشې شوی نه دی.
محکمې د دلایلو له اورېدو وروسته د منظور پښتين ضمانت د ۳۰ زره کلدارو په ضمانت منلی دی.
منظور پښتبن د ډسمبر په څلورمه هغه مهال ونیول شو، چې په چمن پرلت کې تر وینا وروسته د بلوڅانو اعتراضي احتجاج ته د ګډون لپاره روان و.
پولیسو ادعا کړې، چې پښتین وروسته له هغه نیول شوی چې پلویانو یې په بلوچستان کې د پوځي افسرانو پر موټر ډزې وشوې؛ خو پي ټي اېم په قانون نافذونکو ځواکونو تور پورې کړی، چې د منظور پښتین پر موټر یې ډزې کړې وې.
منظور پښتین تر دې وړاندې هم څو ځلې په بېلابېلو قضیو کې د پولیسو لهخوا نیول شوی و.
