په اسلام اباد کې د بلوڅ پرلت والو مشره ماهرنګ بلوڅ وايي، د خبریالانو ټولنې پولیسو ته شکایت کړی چې بلوڅ پرلت وال دې له دغه ځایه لرې کړي. تېره ورځ د اسلام اباد د خبریالانو ټولنې له پولیسو غوښتي و، بلوڅ پرلت وال چې دا مهال د دغه دفتر مخې ته یې پرلت وهلی له دغه ځایه لرې کړي.
په دغه لیک کې چې یوه کاپي یې افغانستان انټرنشنل پښتو ته هم رسېدلې راغلي، چې د دغه ټولنې ټول لګښت له هغو غونډو او سیمینارونو له اړخه پوره کېږي چې بېلابېلې ټولنې یې دغلته جوړوي او د خبریالانو تولنې ته یې کرایه ورکوي.
د دغې ټولنې په خبره له هغه مهاله چې بلوڅ معترضینو دغلته پرلت وهلی؛ نو هیڅ څوک دغلته غونډه نه نیسي او نه هم دوی ته عایدات لاس ته ورځي.
خو د پرلت یوه مشره ماهرنګ بلوڅ بیا د خبریالانو ټولنې دغه شکایت ته په غبرګون کې ویلي:« دا ډېره دردوونکې ده، چې د اسلام اباد پرېس کلپ د هغو خلکو شتون هم نه شي زغملای چې په سلګونه کسان یې ورک دي، تري تم شوي او تر اوسه یې مړي ژوندي هم معلوم نه دي. موږ په دې پوهېږو، چې ولې هغوی دا کار کړی؟ کېدای شي، چې دا کار هم د پولیسو په لمسون شوی وي.»
ماهرنګ بلوڅ وویل، چې پرلت والو ته د حکومت غبرګون ډېر سوړ او نهیلی کوونکی دی.
هغې وویل، په دې اړه به خپله وروستۍ پرېکړه د یوې خبري ناستې پر مهال په ډاګه کړي.
