د خوړو نړۍوال پروګرام وایي؛ په پام کې لري، چې روانه میاشت له شپږ میلیونه اړمنو افغانانو سره مرستې وکړي. یاد سازمان د مرستو اعلان تر هغو شکایتونو وروسته وکړ، چې افغانستان انټرنشنل د دغې ادارې له خوا د مرسته شویو اوړو د بد وضعیت په اړه د یو شمېر کسانو شکایتونه خپاره کړي وو.
د کابل په ګډون له بېلابېلو ولایتونو څخه د نړۍوالو ادارو یو شمېر مرسته اخیستونکو د ځینو ویډیوګانو په استولو سره وویل؛ هغه اوړه چې د نړۍوالو ادارو له خوا په اړمنو خلکو وېشل شوي د استفادې وړ نه دي.
دغې ادارې سې شنبه (د سلواغې ۳مه) د یوې بیانیې په خپرډولو سره ویلي، چې د ازمایښتونو له مخې وېشل شوي اوړه ښه کیفیت لري او د خوراکي توکو کیفیت د دوی له خوا جدي نیول کیږي.
د خوړو نړۍوال پروګرام همدا راز وایي؛ د هېڅ وېشل شويو خوراکي توکو تاریخ تېر نه دی.
ددغې ادارې په بیانیه کې راغلي: «واقعیت دا دی، چې د خوړو د پروګرام وېشل شوې مرستې د خوړو لپاره هېڅ کوم ګواښ نه رامنځته کوي. له شکایتونو وروسته علمي څېړنو تایید کړه، چې وېشل شوي خوراکي توکي د کیفیت له ستنډرډونو سره برابرې دي.»
د خوړو نړۍوال پروګرام وایي، یوازې په یوه سیمه کې وېشل شویو اوړو ستونزه درلوده چې تر بشپړ څېړنو پورې یې کارونه ځنډیدلي دي.
یادې ادارې له خلکو غوښتي، څو په وېشل شویو خوراکي مرستو کې له کومو ستونزو سره چې مخامخ کیږي له دغې ادارې سره اړیکه ونیسي.
