د طالبانو د بهرنیو چارو وزیر امیر خان متقي د سیمې د لسو هېوادونو له استازو سره په لیدنه کې ټینګار وکړ، چې په افغانستان کې د یوناما په حضور کې د ملګرو ملتونو نوي استازي ته اړتیا نه شته.
طالبانو تر دې وړاندې هم د افغانستان لپاره د ملګرو ملتونو د نوي استازي د ګومارلو په اړه مخالفت کړی و.
د طالبانو د بهرنیو چارو وزارت د ویاند مرستیال ضیاء احمد تکل د چهارشنبې په ورځ (د سلواغې ۴مه) پر خپله اېکس پاڼه لیکلي، چې په دغه لیدنه کې له دې ډلې سره د تعامل پر زیاتېدو او دوام هم ټینګار شوی دی.
ښاغلي متقي د چین، روسیې، ایران، پاکستان، ازبکستان، ترکمنستان، قزاقستان، هند، انډونیزیا او ترکیې هېوادونو له استازو سره په کتنه کې زیاته کړه، چې د دغو هېوادونو استازي دې د دې ډلې پیغام خپلو هېوادونو ته ورسوي؛ څو په سیمه کې د حکومتونه په ګټه له شته فرصتونو استفاده وشي.
دا په داسې حال کې ده، چې تر اوسه له یادو هېوادونو څخه هېڅ یوه هېواد د طالبانو ډله په رسمیت نه ده پېژندلې، خو اکثرو یې له دغې ډلې سره سیاسي او اقتصادي اړیکو ته دوام ورکړی.
تر دې وړاندې د طالبانو د بهرنیو چارو وزارت د ملګرو ملتونو د امنیت شورا د وروستي پرېکړه لیک په غبرګون کې په ځلونو د افغانستان لپاره د ځانګړي استازي ټاکل غیر ضروري اقدام بللی و.
د افغانستان په اړه د ملګرو ملتونو د امنیت شورا د یوه پرېکړه لیک په تصویب سره د دغه سازمان له عمومي منشي انټونیو ګوټرېش څخه غوښتي چې د افغانستان لپاره نوی استازی وټاکي.
د یاد پرېکړه لیک په ملي او نړۍواله کچه ګڼ غبرګونونه راپارولي دي.
