د ناټو تر ټولو ستر ازمایښت د امريکا او د دغه سازمان د ملګرو هېوادونو د ٩٠ زره سرتېرو په ګډون پيل شو. له ۵۰ زیاتې جنګي بېړۍ، ۸۰ جېټ الوتکې او ۱۱۰۰ جنګي وسایط به په اروپا او شمالي اتلانتیک سمندر کې په دغه ازمایښت کې ګډون وکړي.
د «دوامدارې او کلکې دفاع» په ازمایښت کې، چې د مۍ میاشتې تر وروستیو پورې به دوام وکړي، د ناټو غړي هیوادونه به خپل لومړنی ګډ سیمه ییز دفاعي پلان و ازمویي، او په دې سره به یې روسیې ته د احتمالي برید ځواب ویلی وي.
د ناټو په اعلامیه کې د روسیې مستقیم نوم نه دی یاد شوی، خو د ناټو په ستراتیژیک سند کې مسکو د ناټو د غړو پر وړاندې «تر ټولو مهم او مستقیم» ګواښ بلل شوی دی.
دا ازمایښت د ناټو د غړو هېوادونو لپاره یوه مهمه شېبه ده، چې د روسیې له خوا پر اوکراین له یرغل وروسته په تېرو ۷۰ کلونو کې د اروپا په خاوره کې تر ټولو ستره جګړه بلل کېږي.
د روسیې د بهرنیو چارو مرستیال وزیر الکساندر ګروشکو مخکې ویلي وو چې د ناټو د نویو ازمېښتونو اندازه د سړې جګړې پلانونو ته د دغې ټلوالې د «نه بدلېدونکي راستنېدو» ښکارندویي کوي.
