د طالبانو د ټرانسپورټ او هوايي چلند وزارت وايي، له خصوصي سکټور سره یې د ۲ میلیارده ۲۴۰ میلیونه افغانیو په ارزښت د ۳ پروژو تړونونه لاسلیک کړل. دغه وزارت وایي، دې پروژو کې د کابل هوايي ډګر پارکېنګ او انتظارخونه، د فاریاب د اقینې بندر تیرپارک او د هرات د ګذرې ترمینل جوړول شامل دي.
د ټرانسپورټ او هوایي چلند وزیر حمیدالله اخندزاده وایي، د هرات د ګذرې د مسافر وړونکو ترمینل د څه کم دوه میلیاره افغانیو په پانګونې سره په زر جریبه ځمکه په دریو کلونو کې جوړیږي.
د نوموړي په وینا، د فاریاب د اقیني بندر تیرپارک د نوي میلیونه افغانیو په ارزښت په شل جریبه ځمکه او د کابل د هوایي ډګر د پارکینګ او انتظارخونه بیا د درې نیم سوه میلیونه پانګونې سره په یو نیم کال کې جوړیږي.
طالبانو دا نه دي ویلي چې دغه تړونونه له کومو شرکتونو سره لاسلیک شول.
د طالبانو د ریاست الوزراء اقتصادي مرستیال ملا عبدالغني برادر هم نن د دې پروژو د لاسلیک مراسمو کې ګډون درلود.
د نوموړي دفتر خپل اېکس کې د ښاغلي برادر په حواله دغه پروژې د معیاري ټرانسپورټ د رامنځته کېدو او ددې برخې د پرمختګ په برخه کې مهمې بللې دي.
د طالبانو د ټرانسپورټ او هوایي چلند وزارت وايي، ددغو پروژو په پلې کېدو سره به څه باندې دوه زره کسانو ته په مستقیم او غیر مستقیم ډول د کار زمینه برابره شي.
د جمهوریت له سقوط وروسته د کابل هوایي ډګر ډیرې برخې د خلکو د ګڼې ګونې له امله زیانمنې شوې وې خو د قطر په تخنیکي همکارۍ سره بیا ورغول شو.
د طالبانو د ټرانسپورټ او هوایي چلند وزارت تیر کال ویلی و چې د کابل هوایي ډګر اویا سلنه فعاله شوې ده او د بشپړ جوړولو لپاره یې هڅې روانې دي.
