د عراق د لومړي وزیر دفتر نن وویل، په دغه هېواد کې د ایران پلوه ملېشو پر اډو د امریکا په هوايي بریدونو کې د ملکي وګړو په ګډون ۱۶ تنه وژل شوي او ۲۵ نور ټپیان شوي دي. د محمد شياع السوداني دفتر د امريکا دغه بريدونه د عراق له ملي حاکميت سرغړونه بللې او غندلې يې دي.
د وژل شویو کسانو د هویت په اړه جزیات نه دي ورکړل شوي.
د عراق د لومړي وزیر دفتر ویلي، چې واشنګټن دغه بریدونه له بغداد سره له همغږي پرته کړي او دا ډول ادعاوې یې "دروغ" بللې دي.
د ښاغلي سوداني د دفتر په خبرپانه کې راغلي دي: «په سیمه کې د امریکا په مشرۍ د پوځي ایتلاف شتون د عراق امنیت او ثبات ته د ګواښ او په سېمه ییزو او نړیوالو شخړو کې د عراق د مداخلې د توجیه کولو وسیله ګرځیدلې ده.»
د امریکا پوځ په اردن کې د ایراني ملاتړو ملېشو په بریدونو کې د خپلو دریو سرتېرو د وژل کېدو په غبرګون کې تېره شپه په عراق او سوریه کې د سپاه پاسداران د قدس ځواک او ایران پلوه ډلو اړوند له ۸۵ پر زیات هدفونو بریدونه وکړل.
دغه بریدونه د امریکا د څو ورځو د بریدونو د لومړي پړاو په توګه اعلان شول او د بي يو اوږد واټن ویشتونکې الوتکې هم پکې شاملې وې، چې له امریکا څخه يې الوتنه کړې وه.
اټکل دی چې په راتلونکو ورځو کې په سوریه او عراق کې پر ځينوهدفونو نور بریدونه هم وشي.
د تېر کال د اکټوبر په اوومه د غزې د جګړې له پيل راهيسې، د ايران ملاتړو ملېشو په عراق او سوريه کې د امريکا پر پوځي اډو تر سلو ډېر بريدونه کړي دي.
په دغو بریدونو کې تر ټولو مرګونی برید په اردن کې د امریکا پر پوځي اډې د ډرون بريدو و، چې له سوریې سره پولې ته څېرمه موقعیت لري.
په دغه برید کې درې امریکايي سرتېري وژل شوي او ۴۱ نور سرتېري ټپیان شوي دي.
امريکا ته د دغو پوځیانو د جسدونو له رسېدو سره هم مهاله امريکا په عراق او سوريه کې پر خاصو هدفونو بريدونه شروع کړه.
توکیو په دې ورستیو اونیو کې ټرامپ ته له نږدې کسانو سره د تعامل هڅې ګړندۍ کړي، ځکه چې په راتلونکو ټولټاکنو کې د یوه مخکښ کاندید په توګه د ۷۷ کلن ټرامپ بریا تر ډیره شونې بریښي.
د رویټرز خبري اژانس د راپور له مخکې، د جاپان دغه هسې له شپږو جاپانې چارواکو سره د مرکو په اساس په داسې حال کې ښکاره کیږي چې د جاپان لومړی وزیر فومیو کیشیدا د اپریل په میاشت کې د متحده ایالاتو د ولسمشر جو بایډن په بلنه امریکې ته سفر کوي.
د درېیو چارواکو د معلوماتو له مخې د دغه سفر په پلاوي کې د واکمن ګوند لوړ پوړي چارواکي هم شامل دي او دوی به امریکا ته د سفر پر مهال له ټرامپ سره د لیدو هڅه وکړي.
د شپږو جاپاني چارواکو د خبرو له مخې چې نه یې غوښتل نومونه یې واخیستل شي، د توکیو ستره اندېښنه داده که چیرې ټرامپ بیرته واک ونیسي، هغه به د دوو مخکښو هېوادونو تر منځ اقتصادي یا امنیتي تړون لاسلیکول وغواړي چې دا به د چین سره د مقابلې لپاره د اوو بډایه هېوادونو (جي ۷ډلې) وروستې هڅې زیانمنې کړي.
جاپاني چارواکو ویلي، چې د ټرامپ د پلانونو په اړه مشخص معلومات نه لري، خو د ټرامپ د تېرې ولسمشرۍ دورې کړنو په اړه اندېښنه لري. ټرامپ د خپلې ولسمشرۍ په تیره دورې کې له شي جینپینګ سره د خپلو اړیکو دفاع وکړه او همدا راز د شمالي کوریا له مشر کیم جونګ اون سره د اټومي تړون په لټه کې ناکام شو.
د جاپان د بهرنیو چارو وزارت دوو چارواکو ویلي، دوی وېره لري چې ټرامپ به له چین سره د یوې موافقې په تعقیب له ټایوان د امریکا ملاتړ کمزوری کړي.
د ټرامپ یو همکار رویترز ته ویلي، په دې نژدې وختونو کې د ټرامپ او جاپاني چارواکو تر منځ کومه کتنه نه ده شوې. هغه په دې اړه له نورې تبصرې ډډه وکړه.
د چین او تایوان د بهرنیو چارو وزارتونو ویلي چې دوی به د ټاکنو پایلو ته په پام سره له متحده ایالاتو سره له نږدې کار وکړي.
د جاپان پخوانی لومړی وزیر شینزو ابې لومړنی بهرنی مشر و چې د ۲۰۱۶ کال له بریا وروسته یې له ټرمپ سره وکتل.
