د طالبانو د کډوالو وزارت: تر ۴۰۰ ډېر افغان کډوال له پاکستانه په جبري توګه راستانه کړای شول
د طالبانو د کډوالو او بېرته راستنېدونکو چارو وزارت شنبه د سلواغې په ۱۴مه نېټه په اېکس پاڼه خبر ورکړی، چې ۴۹۴ افغان کډوال د سلواغې په ۱۲مه او ۱۳مه د سپین بولدک او تورخم له لارې هېواد ته په زوره راستانه کړای شوي دي.
د ننګرهار ولایت د تورخم سرحدي امریت د مالوماتو پر بنسټ، ۷۸ کورنۍ چې ټولټال ۳۴۸ کسان کېږي په جبري توګه له پاکستانه ستنې شوې دي.
د دغه امریت په وینا، دغه کډوال یې د مرستو ترلاسه کولو په موخه د کډوالۍ نړۍوال پروګرام او د ملګرو ملتونو عالي کمېشنرۍ ته معرفي کړي دي.
له بلې خوا د کندهار ولایت د سپین بولدک د سرحدي امریت د مالوماتو له مخې، ۲۹ کورنۍ چې ټولټال ۱۴۶ کسان کېږي په جبري توګه د سپین بولدک له لارې هېواد ته ستنې شوې چې د مرستو د ترلاسه کولو په موخه د خوړو نړۍوال پروګرام، د کډوالۍ نړۍوال سازمان او د ملګرو ملتونو عالي کمېشنرۍ ته معرفي شوي دي.
له بلې خوا اوچا تېره ورځ ویلي، چې د روان کال په جنورۍ میاشت کې له پاکستانه د راستنېدونکو افغانانو شمېر له ۵۰۰ زرو لوړ شو.
د ملګرو ملتونو د همغږۍ ادارې اوچا ویلي و، چې د دغه شمېر ۸۴ سلنه یې د ۲۰۲۳ کال په درېیو وروستیو میاشتو کې خپل هېواد ته راستانه شوي دي.
خو تر دې وړاندې پاکستانۍ رسنیو د اړوندو ادارو د مالوماتو پر بنسټ راپور ورکړی و، چې د ۲۰۲۴ کال د جنورۍ تر ۲۹مې له پاکستانه د ستنو شویو بې اسناده افغانانو شمېر ۴۷۸۳۰۰ ته لوړ شو او د بې اسناده افغانانو د ستنېدو لړۍ لاهم روانه ده.
