د روغتیا نړۍوال سازمان او د سرطان په اړه د څېړنې نړۍوالې ادارې اټکل کړی، چې تر ۲۰۵۰ کال پورې به د سرطان پېښې ۷۷ سلنه زیاتې شي.
دغو سازمانونو په یوه ګډ راپور کې لیکلي، چې په هرو پنځو کسانو کې یو په خپل ژوند کې د سرطان په ناروغۍ اخته کيږي.
د روغتیا نړۍوال سازمان او د سرطان په اړه د څېړنې نړۍوالې ادارې دا راپور د فېبرورۍ په څلورمه د سرطان د نړۍوالې ورځې په مناسبت خپور کړ، چې د نړۍ له ۱۸۵ هېوادونو څخه د دې ناروغۍ ناروغانو ته د خدماتو د پاملرنې او معلوماتو د راټولو په اساس نشر شوی.
په راپور کې راغلي، چې په ۲۰۲۲ کال کې د سرطان شاوخوا ۲۰ میلیونه نوې پېښې او له دې ناروغۍ ۹،۷ میلیونه مړینې ثبت شوې دي.
دغه څېړونو ښودلې؛ د هغو کسانو اټکل شوی شمېر چې د تشخیص څخه پنځه کاله وروسته ژوندی وو ۵۳.۵ میلیونه کسان و.
د سرطان په اړه د څېړنې نړۍوالې ادارې اټکل کړی، چې په هرو ۹ نارینه کې ۱ او په هرو ۱۲ مېرمنو کې یوه د دې ناروغۍ له امله مري.
په راپور کې راغلي، چې یوازې ۳۹ سلنه هېوادونه سرطان د ټولو اتباعو لپاره د لومړنيو روغتیایي خدماتو د یوې برخې په توګه تر پوښښ لاندې راولي.
راپور ښیې، چې د سرطان ۱۰ ډولونه به په ۲۰۲۲ کې د دې ناروغۍ له امله د مړینو شاوخوا دوه پر درېیمه برخه رامنځته کړي.
د سږو سرطان د ۲.۵ ملیون نویو پېښو سره په نړۍ کې تر ټولو عام سرطان دی.
د دې راپور له مخې؛ د سینې سرطان د ۲.۳ میلیون نویو پېښو سره په مېرمنو کې دویم د کولمو سرطان درېیم، د پروستات سرطان څلورم او د معدې سرطان پنځم ځای لري.
د راپور له مخې؛ په ښځو کې تر ټولو عام د سینې سرطان او په نارینه وو کې د پروستات او کولمو سرطان دی.
راپور زیاتوي، چې د رحم سرطان په نړۍ کې د سرطان اتم عام ډول دی او د دغې ناروغۍ له امله د مړینې نهم لامل دی، چې تر ۳۴۸ زرو ډېر کسان یې وژلي دي.
په همدې حال کې په افغانستان کې د سرطان د درملنې د مرکزونو د نشتوالي، د بودیجې د کمښت او د کورنیو له خوا د دغې ناروغۍ په اړه د نه پوهاوي له امله هر کال زرګونه کسان مري.