د طالبانو د کرنې، اوبو لګولو او مالدارۍ وزارت معین مولوی صدراعظم عثماني د اسلامي همکاریو سازمان کې د ترکیې د بشري مرستو د څانګې له مشر خلیل ابراهیم څخه غوښتي چې د افغانستان کروندګر او مالداران سره مرستې وکړي.
د طالبانو تر کنټرول لاندې باختر خبري اژانس د عثماني له قوله ویلي، چې د افغانستان ګروندګر لا زیاتو مرستو او ملاتړ ته اړتیا لري او د دې لپاره چې پر پښو ودریږي لاسنیوی یې وشي.
عثماني ادعا کړې، چې د طالبانو له خوا د نشه یي توکو کرل بند شوي او دا چې خلکو د حلالو محصولاتو کرلو ته مخه کړې ده.
هغه زیاته کړې:“نو اړتیا ده چې دې د دې هېواد له بزګرو سره مرستې وشي چې له بېوزلۍ او ستونزو خلاص شي."
خلیل ابراهیم له افغان بزګرو او مالدارانو سره د بشري مرستو د دوام او زیاتوالي خبر ورکړی.
