د استانبول د محکمې مخې ته په یوه وسله وال برید کې ۲ بریدګر او یو پولیس وژل شوي دي

AP ۱۴۰۲ سلواغه ۱۷

په استانبول کې د یوې محکمې مخې ته د ډزو په پایله کې د درېیو پولیسو په ګډون شپږ تنه ټپیان شوي او یو تن د ټپونو د سختوالي له امله مړ شوی دی.

د ترکیې د کورنیو چارو وزارت اعلان وکړ، چې دوه بریدګر د امنیتي ځواکونو له خوا وژل شوي دي.

د سې شنبې په ورځ (د سلواغې ۱۷ مه) له غرمې مخکې د استانبول ښار د کاګالیان محکمې د دروازې مخې ته پر پوسته برید وشو.

د ترکیې د کورنیو چارو وزیر علي یرلیکایا د یوې اعلامیې په خپرولو سره ویلي، چې د دغه وسله وال برید دوه عاملین چې یوه یې ښځه او بل یې سړی و، وژل شوي دي.

هغه دا برید یو تروریستي برید بللی او عاملین یې د خلق د ازادۍ غوښتونکو ګوند بللی دی.

د دې ډلې وروستي راپور شوي عملیات په ۲۰۱۵ کې وو او په استانبول کې د پولیسو پر مرکز، د عدلیې پر ماڼۍ او د امریکا پر کونسلګرۍ درې جلا بریدونه شوي چې په پایله کې یې یو څارنوال او یو پولیس وژل شوي وو.

د ۲۰۱۴ کال د اګست په ۱۹مه د امریکا پر کونسلګرۍ په برید کې دواړه برید کوونکي ښځې وې او یوه یې هم نیول شوې وه.

دغه ډله د ترکیې د حکومت، متحده ایالاتو او اروپايي ټولنې له خوا د یوه تروریستي سازمان په توګه پېژندل شوې ده.

تېره اونۍ دوو نقاب پوشانو د استانبول ښار د سانتا ماریا (هولي مریم) په ایټالوي کلیسا برید وکړ، چې په ترڅ کې یې یو کس ووژل شو او دوه بریدګر ونیول شول.

داعش د دغه برید مسوولیت په غاړه واخیست.

ترکیې تر دې مخکې له داعش سره د تړاو او په ترکیه کې پر کلیساګانو، عبادت ځایونو او د عراق پر سفارت د بریدونو د پلان په تور د ۳۲ کسانو د نیولو اعلان کړی و.

نور خبرونه

رادیو

ستاسو د غږ لپاره کور

خپل فلمونه او غږونه را ولېږئ