د طالبانو د رییس الوزرا سیاسي مرستیال د چهارشنبې په ورځ وویل، چې د دې ډلې استازولۍ د نړۍ په ۳۸ هېوادونو کې فعاله دي.
مولوي عبدالکبیر په کابل کې په یوه غونډه کې د جزییاتو له ورکولو پرته وویل، چې طالبان د متوازن بهرني سیاست په رڼا کې له ټولو هېوادونو سره مثبتې او رغنده اړیکې غواړي.
دغه طالب چارواکي د هغو هېوادونو نومونه وانه خیستل چې د دغې ډلې استازولۍ پکې فعاله دي.
ایران، پاکستان، چین، روسیه، ترکیه، قطر او په دې وروستیو کې ازبکستان هغه هېوادونه دي، چې په افغانستان کې یې په خپلو سفارتونو کې د طالبانو ډېپلوماتان منلي دي.
داسې ښکاري چې د افغانستان د فعاله استازولیو په اړه د عبدالکبیر موخه په بهر کې د افغانستان ډېپلوماتیکې استازولۍ دي، چې لوړپوړي کارکوونکي کې یې د دغې ډلې د بهرنیو چارو وزارت له خوا ټاکل شوي او یا هم له دغه وزارته دستور اخلي.
دغو هېوادونو په داسې حال کې د افغانستان سفارتونو ته د طالبانو استازي منلي، چې د نړۍ هېڅ هېواد د طالبانو حکومت په رسمیت نه پيژني.
په داسې حال کې چې د ملګرو ملتونو امنیت شورا په دې وروستیو کې د داعش ډلې په ګډون د ترهګرو ډلو د ګواښ او د طالبانو او القاعدې ترمنځ د نږدې اړیکو په اړه راپور خپور کړی، دغه طالب چارواکي ادعا کړې چې نړۍ د افغانستان په اړه اندېښنه نه لري.
عبدالکبير وويل: "د ځينو منفي تبليغاتو برعکس نړۍ د افغانستان په اړه اندېښنه نه لري او حکومت په دې برخه کې خپلې ژمنې پوره کړي."
نوموړي زیاته کړه، چې طالبان د افغانستان د امنیت ترڅنګ د سیمې او نړۍ امنیت هم غواړي.