داعش ډلې د یوې اعلامیې په خپرولو سره په بلوچستان کې د چهارشنبې د ورځې د دوو چاودنو مسوولیت په غاړه واخیست.
د پاکستاني چارواکو په وینا، په دغو چاودنو کې لږ تر لږه ۲۸ کسان وژل شوي او لسګونه نور ټپیان شوي دي.
د بلوچستان د اطلاعاتو لنډمهاله وزیر ویلي و، چې د چهارشنبې په ورځ د (سلواغې ۱۸مه) په پښین کې د اسفندیار خان په ټاکنیز دفتر کې چاودنې ۱۶ تنه وژلي او ۲۴ نور یې ټپیان کړي دي.
دغه پاکستاني چارواکي په اېکس پاڼې لیکلي چې، په کلا سیف الله کې د پاکستان د جمعیت علمای اسلام د مشر مولانا فضل رحمان پر ټاکنیز دفتر په دویمه چاودنه کې ۱۲ کسان وژل شوي دي.
دغه چاودنې په پاکستان کې د سیاسي ګوندونو د ټاکنیزو کمپاینونو له درول کېدو یوه ورځ وروسته وشوې.
په پاکستان کې نن ټاکنې ترسره کېږي او په بلوچستان ایالت کې پرونۍ چاودنې په ټاکنو کې د ناامنیو د زیاتېدو په اړه اندېښنې زیاتې کړې دي.