د ازبکستان، پاکستان او قطري استازو په حضور کې د افغان ټرانس پروژې څلور اړخيزه ناسته د ازبکستان په تاشکند ښار کې ترسره شوه؛ خو طالب استازو پکې په انلاین بڼه ګډون لاره.
د طالبانو د اوسپنې پټلۍ ادارې په اېکس پاڼه لیکلي، چې په غونډه کې د قطر د ريل پټلۍ استازو په افغان-ټرانس پروژه کې د ګډون او پانګونې لپاره لېوالتيا ښودلې او د دغې پروژې په لړ کې د شته هېوادونو ونډه او پانګونه يې هم په دغې عايداتي او پراختیایي پروژه کې مهمه وبلله.
د طالبانو د اوسپنې پټلۍ اداره وایي، د غونډې په اوږدو کې ټولو خواوو پر دې هوکړه وکړه چې د افغان-ټرانس پروژې د ارزونې او اسانتياوو برابرولو لپاره بايد په راتلونکې ناسته کې بشپړه طرحه وړاندې شي.
د غونډې په پای کې پرېکړه شوې، چې د روانې فبرورۍ پر ۱۹مه د دغې پروژې د تمويل، فزيکي څېړنې او په دې پروژه کې د نويو ګډونوالو او پانګهوالو د څرنګوالي او بشپړوالي په موخه دريېمه ناسته جوړېږي.
دغه اداره زیاتوي، چې د افغان-ټرانس پروژې د پلان له مخې به یو نړۍوال مشورتي شرکت د دغې پروژې اړین معلومات چمتو کړي؛ ترڅو دغه معلومات له هېوادونو او نړۍوالو مالي بنسټونو سره شریک کړي چې له مخې یې نړۍوال بنسټونه او هېوادونه دې ته لېواله شي، چې د دغې مهمې عایداتي او پراختیایي پروژې په جوړولو کې پانګونه وکړي.
د افغانستان، پاکستان او ازبکستان ترمنځ د دغې پروژې لاسلیک شوي پروتوکول کې راغلي، چې د ريل پټلۍ دا کرښه به د مسافرو او سوداګریزو توکو لېږدولو خدمتونه اسانه کړي او د سیمهییزې سوداګرۍ او اقتصادي ودې په پرمختيا کې به مرسته وکړي.