د جمعیت اسلامي ګوند غړي عطامحمد نور په اېکس پاڼه لیکلي، د دوحې په تړون کې افغانستان د ملي او نړۍوالو دسیسو او د نورو هېوادونو د غوښتنو له امله کارول شوی او داسې نه شي کېدای چې زموږ هېواد دې د پردیو پرېکړو په سیمه بدل شي.
هغه وایي، روښانه ده چې په افغانستان کې اوسنی واکمن وضعیت د لویو ملي او نړۍوالو دسیسو او د دوحې تړون د ناسمې پرېکړې پایله ده.
هغه ریاته کړې:« دغه نیواک زموږ خاوره له سیاسي اړخه دومره کمزورې کړې، چې زموږ د یوه ګاونډي هېواد لوړ پوړی ډیپلوماټ زموږ پر ځمکه د مالکیت دعوه کوي.»
هغه وایي:« زموږ د ګاونډي هېواد د يوه لوړ پوړي ډيپلوماټ وروستۍ څرګندونې ښيي، چې هغه يا زموږ د هېواد د تاريخي پېښو په درک کولو کې بې غوري کړې او يا يې له سياسي پلوه تعصب کړى دى.»
تېره ورځ د افغانستان لپاره د ایران استازي ویلي و، که اړتیا پېښه شي له غزې څخه د ملاتړ لپاره به له افغانستانه «د استشهادي ځواکونو لښکر» واستوي.
حسن کاظمي قمي د افق دولتي شبکې ته ویلي و، چې افغانستان له غزې لرې پروت دی؛ خو د «مقاومت ځواکونو» یوه برخه ده.
ایران تر خپل ملاتړ لاندې ډلې او نورې هغه ډلې چې په سیمه کې د لوېديځې ټلوالې او اسراییل پر ضد جنګېږي، د «مقاومت ځواکونه» نوموي.
ښاغلي نور لیکلي، نننی حالت یو نامشروع واکمني ده او ورسره هر ډول تعامل د افغانانو د غوښتنو له پامه غورځول او د بشري حقونو، ازادۍ، عدالت، برابرۍ او متقابل زغم پر ضد د یوې ظالمې ډلې ملاتړ ګڼل کېږي.
هغه وایي:« په تېرو شلو کلونو کې نړۍوالې ټولنې او په ځانکړې توګه امریکا د دولتونو په رامنځته کولو کې ځانګړی رول لاره او په کورنیو چارو کې مو ملي ګټو له مخې دغه لاسوهنه هغه مهال غندلې؛ خو ورته د اشغال نوم ورکول بیا د طالبانو له فکر او شعوره د پیروي کولو او د افغانانو د سیاسي ارادې سره جفا کول دي.»
هغه زیاته کړې، چې افغانستان ډېرې لوړې ژورې تېرې کړې؛ خو هېوادونه دې زموږ خپلواکۍ او ملي واکمنۍ ته درناوی وکړي.
هغه وایي:« زموږ هېواد د نورو د نیابتي ځواکونو د تولید سرچېنه نه ده، چې له هغه ځایه یې د استشهادیانو د استولو امر بل څوک وکړي.»
