د فاطمیون د وسله والو د جنازې مراسم د ایران په ورامین او مشهد کې ترسره شول
ایراني رسنیو د جمعې په ورځ (د سلواغې ۲۰مه) په سوریه کې د فاطمیون د ډلې د وژل شویو وسله والو د جنازې د مراسمو یوه ویډیو خپره کړه چې په ورامین ښار کې ترسره شوې ده.
ایراني رسنیو د جمعې په ورځ (د سلواغې ۲۰مه) په سوریه کې د فاطمیون د ډلې د وژل شویو وسله والو د جنازې د مراسمو یوه ویډیو خپره کړه چې په ورامین ښار کې ترسره شوې ده.
تر دې وړاندې د فاطمیون ډلې د پنځو غړو د جنازې لپاره د سلواغې په ۱۷مه نېټه په مشهد کې هم مراسم جوړ شوي وو.
په هغو انځورونو کې چې د جمعې د ورځې د جنازې له مراسمو څخه خپاره شوي، لیدل کیږي چې د وژل شوو کسانو خپلوان او کورنۍ د دوی پر تابوت ژاړي.
د فاطمیون ډلې د وژل شوو غړو د کورنیو د ماتم په اړه د خپرې شوې دغې نوې ویډیو د ثبت دقیقه نېټه معلومه نه ده.
د سپاه پاسداران اړوند رسنیو راپور ورکړی، چې د شنبې په ورځ (د سلواغې ۱۴مه)په سوریه کې د امریکا د توغندیو په بریدونو کې د فاطمیون ډلې یو جګپوړی غړی او څو نور افغان جنګیالي وژل شوي دي.
د فاطمیون ډله یوه نیمه پوځي ځواک دی چې د قدس ځواک تر څارنې لاندې فعالیت کوي او ډېری غړي یې په ایران کې مېشت افغان کډوال دي.
قدس ځواک د سپاه پاسداران انقلابي څانګه ده.
دغه وسله وال په تېرو کلونو کې د بشار الاسد د حکومت په پلوۍ د سوریې د جګړې پر مهال دغه هېواد ته استول شوي وو.
په ۲۰۱۹ کال کې د افغانستان پخواني حکومت د ایران له اسلامي جمهوریت څخه وغوښتل چې د فاطمیون ډله منحل کړي.
هغه مهال چارواکو ټینګار کاوه چې په نیابتي جګړو کې د افغان مهاجرینو کارول له نړۍوالو قوانینو سره سمون نه لري.
د بشري حقونو څارونکو او فعالانو تل د ایران د اسلامي جمهوریت پر هغې کړنې نیوکه کړې چې په ایران کې د افغان کډوالو د اوسیدو له خرابو شرایطو څخه په ګټې اخیستنې سره، دوی د سوریې په شمول د سیمې جګړو ته د ګډون لپاره هڅوي.
