د طالبانو د کورنیو چارو وزارت ویاند وايي، دوه هغه وروستي افغان بندیان چې ګونتنامو کې له اوږدې مودې بند وروسته د امریکایانو له خوا په عمان کې نظربند وو، د دې ډلې د هڅو په بایله کې ازاد شول. عبدالمتین قانع خوشي شوي زندانیان د عبدالکریم او عبدالظاهر صابر په نومونو یاد کړي دي.
د طالبانو د کورنیو چارو وزارت ویاند نن په خپله اېکس پاڼه کې د دې دوو طالب زندانیانو په اړه معلومات خپاره کړي دي.
حاجي عبدالکریم
دا دی خوست ولایت د تڼیو ولسوالۍ د ووزیانو د کلي اوسیدونکی دی.
نوموړی ۲۰۰۲م کال د اګست د میاشتنې ۱۴مه د پاکستان حکومت ونیوه، له څو میاشتني بند وروسته یې امریکانو ته وسپاره.
عبدالکریم د ۲۰۰۳ زېږدیز کال په لومړیو کې امریکایانو ګوانتنامو ته ولېږداوه چې د ۱۴ کالو زندان تر ربړو وروسته له ګوانتنامو څخه عمان ته انتقال شو.
عبدالکریم اووه کاله په عمان کې اوسېده او په یاده موده کې یې بهر ته د تګ اجازه نه لرله.
د طالبانو کورنیو چارو وزارت ویاند په اېکس پاڼه کې لیکلي چې د طالبانو په هڅو له نوموړي دغه بندیزونه لرې او کالونه وروسته خپل وطن او ټاټوبي ته راستون شو.
ملا عبدالظاهر صابر
ملا عبدالظاهر صابر د لوکر ولایت د مرکز د حصارک کلي اصلي اوسیدونکی دی او په ۲۰۰۲ میلادي کال کې د امریکايي ځواکونو لخوا ونیول شو.
څلور کاله د بګرام زندان کې له بند تېرولو وروسته ګوانتنامو زندان ته انتقال شو.
ملا عبدالظاهر د ۲۰۱۷ میلادي کال کې د ګوانتنامو زندان څخه ازاد او وروسته عمان ته انتقال شو.
نوموړی ۷ کاله په عمان کې اوسېده او په یاده موده کې یې بهر ته د تګ اجازه نه لرله.
د طالبانو د کورنیو چارو وزارت ویاند ددې طالب راخوشې شوو زندانیانو په اړه نه دي ویلي چې دوی کومې معاملې له مخې ازاد شوي دی.
طالبانو له دې وړاندې بشر نورزی چې د طالبانو له با نفوده څیرو څخه دی، په ګوانتانامو کې دوه لسیزو بند تېرولو وروسته، له یوه امریکايي انجینر مارک فریکس سره په ۱۴۰۱ کال کې تبادله کړ او له بنده خوشې شوو.
چې د خلاصون پرمهال په کابل کې ورته د طالبانو استخباراتو ځانګړي مراسم نیولي وو.
