د اسلام اباد پولیسو له هغه وروسته د «ناقانونه» راټولېدنو خلاف د قانوني چلند اعلان وکړ چې تمه کیږي، نن یکشنبه د عمران خان د ګوند پلویان د ټاکنو د پایلو نه اعلانېدو په غبرګون کې لاریونونه وکړي.
پولیسو په اسلام اباد کې د «دفعه ۱۴۴» د پلي کېدا خبر ورکړی.
د اسلام اباد پولیسو د یکشنبې په ورځ د (سلواغې۲۲مه) اعلان وکړ چې د «ناقانونه» راټولېدنو په وړاندې به قانوني چلند وکړي.
د اسلام اباد پولیسو له لوري په خپره شوې اعلامیه کې ویل شوي چې ځینې کسان د ټاکنو کمیسیون او نورو دولتي ادارو په شاخوا کې «ناقانونه» راټولېدنو ته هڅول کیږي. د پولیسو په خبره د خلکو راټولو هڅه هم «جرم» دی.
د اسلام اباد پولیس له خلکو غوښتنه کوي چې د «ناقانونه» فعالیتونو او راغونډېدو څخه ډډه وکړي.
د اسلام اباد پولیس په داسې حال کې د «دفعه۱۴۴» د پلي کېدو خبر ورکوي چې د عمران خان د ګوند چارواکو ویلي، د ټاکنو کمیسیون له لوري د ټاکنو د ورستیو پایلو نه اعلانولو په غبرګون کې به لاریونونه وکړي.