د طالبانو کډوالو او راستنېدونکو چارو وزارت وايي، تېره ورځ له پاکستانه له سلو زیات افغان کډوال په زور را ارېستل شوي دي. دغه وزارت د سې شنبې ورځ د (سلواغې۲۴مه) په اېکس پاڼه لیکلي چې تېره ورځ ۱۵۴ تنه افغان کډوال د کندهار سپین بولدک او ننګرهار تورخم له لارو هېواد ته راستانه شوي.
دغه وزارت ویلي راستانه شوي ټول شمېر کډوال په جبري ډول هیواد ته راستانه کړل شوي دي.
د ننګرهار ولایت د تورخم سرحدي قوماندانۍ د معلوماتو له مخې، د تورخم له لارې ۲۱ کورنۍ چې ټول شمېر یې ۸۰ تنه کیږي راستنې شوې او تر ثبتېدو وروسته د کډوالو عالي کمیشنرۍ او کډوالو نړېوال سازمان ته د مرستو ترلاسه کولو په موخه ور پیژندل شوي.
همدارنګه د کندهار ولايت د سپين بولدک سرحدي قوماندانۍ د معلوماتو له مخې، د سپین بولدک له لارې ۱۴ کورنۍ چې شمېر یې ۷۴ تنه کیږي په زور له پاکستانه راستنې شوي چې دوی هم له ثبتېدو وروسته د کډوالو عالي کمیشنرۍ او کډوالو نړېوال سازمان ته د مرستو ترلاسه کولو په موخه ور پیژندل شوي.
له شاوخوا څلورو میاشتو راهیسې له پاکستانه د افغان کډوالو د ایستلو لړۍ دوام لري او تېره اوونۍ د ملګرو ملتونو د بشري مرستو همغږۍ ادارې یا اوچا ویلي و چې تر دې مهاله له پنځو لکو ډیر افغان کډوال له پاکستانه ایستل شوي دي.
