سرچینو افغانستان انټرنشنل ته وویل، چې وسله والو طالبانو په کابل کې پر یوه مسافر وړونکي موټر ډزې کړي او پنځه کسان یې وژلي دي.
د سرچينې د معلوماتو له مخې؛ دغه پلټونکې پوسته د کابل په "دهنه قصبه" کې موقعيت لري او په قربانيانو کې موټر چلوونکى او څلور مسافر شامل دي.
د قربانیانو یوه خپلوان افغانستان انټرنشنل ته وویل، چې دا پېښه د دوشنبې په ورځ (د سلواغې په ۲۳مه) شوې ده.
هغه زیاته کړه؛ د قربانیانو کورنۍ له پرون راهیسې د کابل په روغتونونو کې د خپلو عزیزانو جسدونه لټوي او په پای کې یې جسدونه د کابل په عدلي طب کې وموندل شول.
د دې سرچینې په وینا؛ طالبانو نه یوازې دا چې د دوی جسدونه نه دي سپارلي، بلکې د دوی د ډزو د علت له څرګندولو یې هم ډډه کړې ده.
په دې ډزو کې یو تن وژل شوی، چې رامیش نصیري نومیږي او د پنجشیر اوسېدونکی و.
د نوموړي یوه نږدې خپلوان افغانستان انټرنشنل ته وویل، چې ښاغلی نصیري او څلور نور کسان د دوشنبې په ورځ هغه مهال د طالبانو په ډزو ووژل شول چې له پلخمري څخه قصبې ته روان وو.
سرچینې زیاته کړه؛ رامش نصیري د کابل پوهنتون د حقوقو او سیاسي علومو د پوهنځي محصل و او هېڅ سیاسی فعالیت یې نه درلود .
طالب چارواکو تر اوسه په دې اړه څه نه دي ویلي.