د اسراييل لومړي وزير بنيامين نتنياهو له جګړې وروسته د غزې د ادارې په هکله خپل پلان وړاندې کړ. د "یوه ورځ وروسته" په نوم دا پلان د حماس تر کنټرول لاندې فلسطينۍ خاورې په اړه د جګړې له پای ته رسېدو وروسته د هغه لومړنی رسمي وړانديز دی.
د هغه سند له مخې چې د پنجشنبې په ورځ د اسراییل کابینې غړو ته وړاندې شوی او د جمعې په ورځ د رویټرز خبري اژانس له خوا لیدل شوی، اسراییل به د اشغال شوې لویدیځې غاړې او غزې په ګډون د اردن په لویدیځ کې پر ټولو سیمو امنیتي کنټرول ولري، خو دا هغه سیمې دي چې فلسطینیان غواړي پکې یو خپلواک دولت رامنځ ته کړي.
نتنیاهو د فلسطین دولت "یو اړخیزه په رسمیت پیژندل" رد کړي دي. هغه وايي، چې د فلسطینیانو سره یو جوړجاړی به یوازې د دواړو خواوو ترمنځ د مستقیمو خبرو اترو له لارې ترلاسه شي - خو دا یې نه دي ویلي، چې د فلسطین اړخ به څوک وي.
نتنیاهو وايي، چې په منځنۍ موده کې یې موخه په غزه کې د اورپکو بې وسلې کول او د افراطیت له منځه وړل دي.
هغه دا روښانه کړې نه ده چې دا پلان به کله پلي شي او د څومره مودې لپاره به دوام وکړي.
خو هغه د غزې تړانګې د بیا رغولو شرط، د دغې سیمې په بشپړه توګه بې وسلې کول ټاکلي. د غزې نږدې ټولې برخې د اسراییل په بریدونو کې ویجاړې شوې دي.
نتنیاهو وړاندیز کړی چې اسراییلي ځواکونه باید د غزې په سویل کې د مصر او غزې په پوله کې شتون ولري او په دې سیمه کې د مصر او متحده ایالاتو سره همکاري وکړي ترڅو غزې ته د وسلو او مهماتو د قاچاق د هڅو مخه ونیسي.
په غزه کې د حماس د واکمنۍ د بدلولو لپاره، نتنیاهو وړاندیز کړی چې د غزې د سیمه ییزو استازو سره کار وکړي " چې د ترهګرو هیوادونو یا ډلو سره تړاو نلري او د دوی لخوا یې مالي ملاتړ نه کیږي".
هغه د فلسطیني کډوالو لپاره د ملګرو ملتونو ادارې د بندولو او د هغې پر ځای د نورو نړیوالو مرستندویه ادارو د ګومارلو غوښتنه هم کړې ده.
حماس وايي چې د دې ډلې د سیاسي دفتر مشر اسماعیل هنیه په غزه کې د احتمالي اوربند او د اسراییلي یرغملو د خوشي کولو په اړه له مصري چارواکو سره خبرې پای ته رسولې دي. دغې وسله والې ډلې ویلي، چې ښاغلی هنیه له خبرو وروسته له مصره وتلی دی.
د حماس له خوا د جمعې په ورځ په یوه خبرپاڼه کې راغلي چې دا نه ده څرګنده، چې ایا د مصر د استخباراتو د ادارې له مشر عباس کامل سره د هنیه خبرې اترې د جګړې د پای ته رسولو او د یرغمل کسانو د خوشې کولو او غزې ته د مرستو د رسولو په اړه شوې او که نه.
په قاهره کې دا خبرې په پاریس کې د لوړې کچې له غونډې مخکې شوې دي.
د پنجشنبې په ورځ، د اسراییل چینل ۱۲ راپور ورکړ، چې حکومت یې په پاریس کې د غزې د یرغمل شویو د خوشي کولو لپاره یوې موافقې ته د رسیدو لپاره په پاریس کې د نویو خبرو اترو لپاره چمتو دی.
په غزه کې د اوربند د ټینګولو لپاره په پاریس کې د خبرو مخکینی پړاو د حماس له غوښتنې وروسته کومې نتیجې ته ونه رسید.
په غزه کې روانه جګړه، چې د تېر کال د اکټوبر په اوومه د حماس له خوا پر اسراییل له ناڅاپي برید وروسته پیل شوې، پنځمې میاشتې ته رسېدلې ده.
تمه ده، چې په پاریس کې نړیوال منځګړي د یرغمل شویو کسانو د خلاصون لپاره یوه نوې طرحه وړاندې کړي.
د پاکستان د مذهبی ډلو سلګونو ملاتړو نن د دغه هېواد لوی قاضي د هغو څرګندونو پرضد مظاهره وکړه چې دوی یې مذهب ته سپکاوی بولي. د تحریک لبیک په مشرۍ د مختلفو مذهبي ډلو مظاهره چیان وايي، د احمدي ټولنې د یوه غړي دوسیه کې د قاضي فایز عیسا څرګندونې د اسلام ضد دي.
محکمې د روانې اونۍ لومړیو کې د احمدیه ټولنې د یوه غړي ضمانت منظور کړ او ویې ویل چې نوموړي مذهب ته د سپکاوي خبره نه ده کړې.
دا سړی د اسلام ادبیاتو د وېش له امله مذهب ته د سپکاوي په تور له ۱۳ میاشتو راهیسې زندان کې و.
یو پولیس افسر ابرار حسین مظاهره چیانو ته د سوله ییز پاتېدو خبرداری ور کوي او وايي، له جوماتونو بهر مظاهرې به څاري.
پېښور کې پولیس چارواکی مبارک خان وايي، په دغه ښار کې هم سلګونه مظآهره چیانو د لوی قاضي پرضد شعارونه ور کړل.
د پاکستان سترې محکمې د لوی قاضي پرضد د اسلامپالو ډلو او ځینې سیاسي مشرانو له کمپاین وروسته د پنجشبنې په ورځ اعلامیه خپره کړه.
دغو ډلو ویلي اساسي قانون کې احمدیه ټولنه مستثنا ده، خو قاضي په خپل حکم سره له قانون سرغړونه کړې ده.
د محکمې اعلامیه کې دا کار شري کمپاین بلل شوی او ویل شوي چې دا فکر یو مخ تېروتنه ده.
د فایز عیسا پرضد کمپاین کې د بندي پخواني لومړي وزیر عمران خان ځینې ملاتړي هم ګډون لري، ځکه ښاغلي عیسا په تېرو ټاکنو کې د تحریک انصاف ګوند ټاکنیزه نښه بېټ ور نه کړ.
د انساني حقونو ډلې وايي، پاکستان کې مذهب ته د سپکاوي قانون تر ډېره د شخصي ګټو لپاره کارول کېږي او په دغه جنایت د یو چا تورنول د ډاګي یا صحرايي محکمې سبب کېدلی شي.
افغانستان انټرنشنل داسې ویډیو ترلاسه کړې، چې وسله وال کسان د شمالي وزیرستان په میرعلي بازار کې د تحریک طالبان پاکستان بیرغ سره په سړکونو کې ګزمې کوي. تر اوسه د پاکستان امنیتي ځواکونو په دې اړه کوم غبرګون نه دی ښودلی.
د جمعې په ورځ د (کپ څلورمه) په رارسیدلې ویډیو کې لیدل کیږي، څو وسله وال چې د تحریک طالبان پاکستان بیرغ یې په لاس کې دی، د موټرو تورې شیشې په ټوپک ماتوي.
د دې وېډیو په اړه د ټي ټي پي پخواني ویاند احسان الله احسان غبرګون ښودلی دی.
احسان الله احسان افغانستان انټرنشنل ـ پښتو ته په اردو ژبه یو یادښت رالېږلی دی.
احسان الله احسان وايي: «دا ویډیو دوه شیان روښانوي، لومړی دا چې د پاکستان د دولت دا ادعا، چې تحریک طالبان پاکستان د افغانستان له خاورې پر پاکستان برید کوي دا ناسمه ثابته شوه، ځکه دا ویډیو د دې شاهدي ورکوي، چې مجاهدین افغانستان کې نه بلکې په پاکستان کې حضور لري، دوی پراخه ساحه لري چې عملیات او ګزمې هم کوي.»
احسان زیاتوي دوهمه دا چې «له دې ویډیو څخه څرګندیږي، د خلکو په وړاندې د تحریک مجاهدینو د نامناسب او ناوړه چلند دی، دوی د موټرو تورې ښېښې ماتوي، چې دا یو نامناسب عمل دی، ځکه چې د ښېښو ماتول یا د نورو عامه ملکیتونو ته زیان رسول په هیڅ ډول شرعيت له مخې د توجیه وړ عمل نه دی، پاکستاني طالبانو مسوولین باید نه یوازې دا چې په دې اړه پام وکړي، بلکې د بښنې په غوښتلو سره د خلکو تاوان جبران کړي.»
د ډیورنډ فرضي کرښې ته څېرمه د شمالي وزیرستان چې د ټي ټي پي د پيدایښت مرکز بلل کیږي، خو ددې ډلې له څه مودې ځنډ وروسته یوځل بیا خپل ځانونه په عام بازاز کې څرګند کړل.
د افغانستان جغرافیه او د وخت د حکومتونو نا سمو پالیسیو دې ته زمینه مساعده کړه، چې افغانستان دې د نړۍوالو او سیمه ییزو هېوادونو د رقابتونو او نیابتي جګړو مرکز وي.
د دې لپاره چې په افغانستان کې د سیمې او نړۍوالو هېوادونو نفوذ شتون ولري، د افغانانو په منځ کې یې د خپلو شومو اهدافو لپاره همېشه د پروکسي ډلو جوړونه او حمایت نه کار اخستې دی. دا یادونه دلته مهمه ده، چې د یو حکومت او نظام پالیسي د وخت د حکومتونو او نظامونو مشرتابه تعینوي.
د نظام او حکومت ښکته طبقې یوازې تطبیق کوونکي او یا مخالفت کوونکي وي. د بېلګې په توګه تاسې ګورئ، چې په کابل کې د طالبانو اکثره مهم لوړپوړي چارواکي؛ لکه د دوی د دفاع، داخله او بهرنیو چارو وزارتونو مسوولین د نجونو د ښونځیو د بندلو او د ښځو په وړاندې د تند چال چلند څخه خوښ نه دي؛ خو پالیسي د طالبانو په کندهار کې د ملا هبت الله په نوم یو شخص چې خلکو ته یې هویت لا په شک دی تعینوي.
د نړۍوالې لومړۍ او دویمې جګړې څخه د مخه، د لوی لوبې (Great Game) په نوم افغانستان د انګلیس او تزار امپراطوریو د رقابتونو ترمنځ حایله سیمه وه.
روسانو غوښتل چې د دغه لارې د هند سمندر ته ورسیږي او انګلیسانو غوښتل چې د روسانو پرمختګ او نفوذ په افغانستان کې ودروي. بالاخره افغانستان د دواړو امپراطوریو تر منځ د بفر زون په توګه پرېښودل شو.
د بفر زون پالیسي د افغانانو لپاره په اقتصادي، فرهنګي او سیاسي لحاظ ډېر تاوان وکړ؛ ځکه افغانستان د سیمې او نړۍ د پرمختګ څخه وروسته پاتې شو. له بله پلوه د وخت امیرانو او حاکمانو به چې د یوې او یا بلې امپراطوریو سره روابط ښه او یا خرابېدل، د هغوي د لرې کولو دسیسې او توطیې به په کار اچول کېدلې، چې هغوی د قدرت څخه لرې او یا د فشار لاندې ونیسي تر څو د انګلیس یا تزار د امپراطوریو اهداف عملي کړي.
د انګریزانو پالیسي چې تفرقه واچوه او حکومت وکړه (Divide and Rule) د افغانستان په سیمه کې ښه د تطبیق وړه وه؛ ځکه په افغانستان کې یې د قومي او قبیلوي رقابتونو څخه کار اخیسته او د افغانانو په روان یې د وخت سره سم په لازمو تګلارو کار کاوه. د انګریزانو دا پالیسي د هند د نیمه وچې د وېشلو پورې روانه وه؛ تر څو چې پاکستان په نوم یو بل نوی هېواد رامنځته شو.
پاکستان د افغانستان په اړه د ابتدا څخه د انګریزانو د هماغه پخوانې پالیسې پر بنیاد، د خپل نفوذ لپاره دوام ورکوي.
د دویمې نړۍوالې جګړې څخه وروسته، نړۍ چې د غرب او شرق په بلاکونو ووېشل شوه، د شرق رهبري، پخواني شوروي اتحاد او د غرب رهبري د امریکا متحده ایالاتو کوله. په افغانستان کې د دواړو بلاکونو اهداف بیا هم هماغه پخواني وو؛ خو تاکتیکونه سره بدلیدل او را بدلیدل.
شوروي اتحاد غوښتل چې د هند سمندر ته ځان ورسوي او امریکا یا غرب د شوروي اتحاد د نفوذ مخه نیوله. افغانستان بیا هم ځان د عدم انسلاک پالیسي چې د بفر زون سره یې چندان توپیر نه درلود په مخ بیوله. په مقابل کې ایران او پاکستان د غرب سره په CENTO کې شامل وو، چې عراق او ترکیه یې هم برخه وه.
د افغانستان په شمالي برخه کې پخوانی شوروي اتحاد و. په داسې حالت کې د افغانستان بې طرفي چندان معنا نه درلوده. افغانستان بحر ته او یا نړۍ سره د پاکستان، ایران او یا شوروي اتحاد له لارې تجارت، راکړه ورکړه درلودله او د دوه لویو بلاکونو او د هغوی د پلویانو تر منځ محاصره و. په همدې خاطر افغانستان همېشه د ایران، پاکستان او د شوروي اتحاد له خوا د فشار لاندې و.
د سوړ جنګ په دوران کې شوروي اتحاد پراکسيچپي احزاب او غرب په افغانستان کې ښې پلوه اسلامي احزاب تقویه کول، چې بالاخره د ثور کوتاه په رامنځته کېدو سره د سوړ جنګ نیابتې جګړې په افغانستان کې نوې بڼه ونیوله. البته د دغه جګړو مقدمه د داود خان د کودتاه سره سم کېښودل شوه. په همدې وخت کې د رضا شاه پهلوي پادشاهې په ایران کې نسکوره او اخوندانو د ایت الله خامنه يي په مشرۍ قدرت ونیوه.
د سوړ جنګ په دوران کې د افغانستان جګړې ته یې د اهل کتاب او غیر اهل کتاب په نوم رنګ ورکړ، چې ایرانیانو هم د شوروي اتحاد په ضد د افغانانو پراکسې اته تنظیمونه چې اکثره یې شیعه مذهبه و، حمایه کول. غرب او عربو په پاکستان کې د مجاهدینو اته ډلې حمایه کولې.
چین هم په دغه وخت کې د شوروي اتحاد سره ستونزه درلوده او په رقابت کې و؛ نو د مجاهدینو د ډلو څخه یې د پاکستان په وسیله حمایت کاوه که څه هم چین هم د شوروي اتحاد غوندې د کمونیستي اډیالوژۍ پر بڼست نظام درلود.
همدا علت دی، چې د دوه ملکونو تر منځ دوه اړخیزه پالیسي د ژبې، قوم، مذهب، ایډیالوژي، تاریخ او فرهنګ په بنیاد نه ټاکل کیږي؛ بلکې د دوه ملکونو تر منځ اړیکې همېشه په دوه اړخیزو ګټو ولاړې وي. کله چې ګټې سره په تقابل کې نه وي؛ نو حمایت او دوستي وي او کله چې ګټې په تضاد کې شوې، بیا حمایت او دوستې نه وي ځکه سیاسي حمایت د راکړې ورکړې مساله ده.
د افراطي ډلو پیاوړتیا:
البته د شوروي اتحاد د سقوط څخه وروسته د دنیا نظم یو قطبي شو او افغانستان د سیمې هېوادونو نفوذ او نیابتيجګړو ته پرېښودل شول. د شوروي اتحاد سره د جنګ په دوران کې نورې ډېرې افراطې ډلې د پاکستان او ایران له خوا ایجاد او حمایه شوې.
دواړو هېوادونو دا افراطي ډلې د خپلو ستراتېژیکو اهدافو لپاره په افغانستان، سیمه او حتا په نورو هېوادونو کې استعمالولې. د القاعده په نوم د عربانو ډله رامنځته شوه. د شرقي ترکستان حرکت د ایغور د مسلمانانو (ETIM) تقویه شو.
د تاجکستان حزب تحریر، د ازبکانو اسلامي تحریک (IMU)، د چیچنیا اسلامي تحریک، داعش په عراق او سوریه کې، د ابوسیاف ډله په اندونیزیا کې، تحریک طالبان پاکستان، لشکر طیبه، سپاه صحابه او نورې ډېرې ډلې رامنځته شوې. ایران د افغانان مهاجرینو په منځ کې د فاطمیون او زنبیون په نوم لېواګانې جوړې او هغوي یې په سوریه او عراق جنګ کې وجنګول.
پاکستان د مجاهدینو ګروپونه حتا په اذربایجان کې د نګورمو قره باغ په سیمه کې وجنګول. لشکر طیبه په کشمیر کې جنګیږي، چې یو شمېر زیات افغانان هم په دغه ډله کې شتون لري. سپاه صحابه د شیعه او سني اختلاف ته لمن وهي.
پاکستان همداشان په طالبانو باندې سرمایه ګذاري وکړه او هغوي تقویه او په افغانستان کې وجنګول. د افغانستان دوه نظامونه د دې پراکسې ډلو له امله سقوط وکړ. افغانستان یو ناامنه او وروسته پاتې هېواد پاتې شو.
په تېرو شلو کلونو کې د جمهوریت په دوران کې افغانانو ته د ټولو ستونزو سره سره د ساه اخستلو د فرصت زمینه برابره شوې وه؛ خو د داخلي کشمکشونو، اشتباه ګانو او د ایران او پاکستان د مستقیم مداخلې په اساس، د هغه طلایي موقع نه په ښه توګه ګټه وانه خستله. هغه فرصت یې په بحران بدل کړ.
ایران او پاکستان:
که پورته تاریخي شالید ته وګورو، ایران او پاکستان ماران روزلي او اوس په خپله ورسره ستونزې لري. ایران د جیش العدل او داعش نه په ویره او جګړه کې دی. پاکستان د ټي ټي پي یا د پاکستان د اسلامي تحریک او بلوڅ بیلتون غوښتونکو د مسلحو قواو سره په جنګ اخته دی. ایران او پاکستان کوښښ کوي، چې دوی په خپله په جنګونو کې دخیل نه شي او یوازې پراکسي جنګې ډلې تقویه او د خپلو ستراتیژیکو اهدافو لپاره یې استعمال کړي.
ایران په عراق کې د مقتدا صدر او نورو شیعه ګروپونو څخه کار اخلي. فاطمون او زنبیون یې په سوریه کې وجنګول او اوس هم هلته د سوريې د حکومت سره اړیکي لري.
حزب الله یې په لبنان کې، حوثي شعیه ګروپونه یې په یمن کې تقویه کړي او هم د حماس سره نږدې اړیکې لري. هر ملک چې افراطي ډلې روزلې، بیا د هماغه افراطي او ملیشه یي ډلو څخه یې ضرر هم لیدلی دی.
نړۍوال او سیمه ییز بحران:
امریکا د القاعده څخه ضرر ولید او د سپتمبر یولسمې نېټې حمله چې په نیویارک کې تر سره شوه د تروریزم سره د مبارزې په نوم د دنیا نظم خراب تراب شو. امریکا او دنیا د یو لوی بحران سره مخامخ ده.
د حماس په تقویه کولو کې اسراییل رول درلود، چې د فلسطین اداره د یاسر عرفات په مشرۍ ضعیفه کړي. نن اسراییل د هماغه حماس ډلې څخه متضرره ده. که اسراییل فلسطینیانو ته ډېر تاوان ورسوه؛ خو د حماس د وروستۍ حملې له امله اسراییل ته په سیاسي لحاظ د نړۍ په کچه سخته ضربه ورسوله.
اسراییل داسې ضربه د اسراییل د جوړیدو څخه وروسته په خپل پنځه اویا کلن تاریخ کې نه وه لیدلې. د اسراییل تصویر یې د نړۍ په کچه خراب او په هاګ کې پرې د جنوسایډ دعوه د جنوبي افریقا له خوا دایره شوې ده.
کله چې یو هېواد اجیرې ملیشې (Mercenaries) د خپلو اهدافو لپاره استخدام او وروزې، دا په خپله د هغه هېواد د سیاسي او پوځي پالیسیو د ناکامېو پیل دی. امریکا لکه بلیک واټر او روسیې د واګنر ډلې استخدام کړې، چې بیا په خپله ورسره په عذاب وو.
د ډاکتر نجیب الله د رژیم د راپرځولو یو مهم عامل د ملېشه یي قوماندانانو رشد او حمایه وه. جمهوریت هم په اخرو دوه کلونو کې د خیزشیانو او محلي پولیسو قرباني شو. ملیشې تر هغې پورې د یو حکومت په خدمت کې وي، چې تر څو ورته هغه هېواد امکانات برابروي؛ خو که بل چا ورته زیات امکانات ورکړل نو د هغوی په خدمت کې وي؛ ځکه د ملیشه یي ډلو وفاداري ملي ګټو او نظام ته نه وي بلکې د پیسو په مقابل کې جنګیږي.
پاکستان او ایران که هر څومره کوښښ وکړي، چې په مستقیمه توګه په یو بل جنګ کې داخل نه شي؛ خو د دغه افراطي ډلو د روزولو او د متضادو ګټو او اهدافو په درلودلو سره به خامخا مجبوریږي، چې د اسراییل غوندې په جنګ کې داخل شي.
امریکا او د روسيی فدراتیف هم نه غوښتل چې په مستقیمه توګه جنګ وکړي؛ خو په اوکراین باندې د روسانو حملې وښودله چې اوس عملاً امریکا او غرب په اوکراین کې د روسانو سره په جنګ کې اخته دي. د ایران حمله په پاکستان باندې او د پاکستان د توغندیو حمله په ایران باندې د وروستیو تحولاتو مهم اثر دی، چې دا جګړه به پراخیږي.
په روان بحران کې د افغانستان سرنوشت:
له بده مرغه؛ افغانان او د افغانستان موجوده حاکمه ډله، به هم د دغه جنګونو یوه برخه وي، ځکه دا هم د ملیشه یي ډلو یوه برخه او ترکیب دی. یوه ډله به یې د ایران حمایت کوي او بله ډله به یې د پاکستان حمایت کوي. د ایران او پاکستان او د هغوي تر شا نور قوتونه؛ لکه روسیه او امریکا غواړي چې ایران په مستقیمه توګه په جګړه کې ښکیل کړي.
د ایران وروستۍ حملې په عراق او پاکستان د نورو رقابتونو او جګړو لپاره لار پرانیستله او وبه ګورئ، چې دا جګړې به تر کومه حده پراخیږي. اصلي خبره د افغانانو لپاره دا ده، چې په داسې جګړو کې ښکیل نه شي خو دا چې په افغانستان کې یو مشروع، قانونمنده او ولسواکه حکومت نه شته.
په دې توګه ملیشه یي حاکمې ډلې ته مشکله ده، چې افغانستان د راروانو سیمه ییزو او نړۍوالو رقابتونو څخه بچ کړي. که څه هم د طالبانو د بحران څخه د فرصت د وسیلې په توګه ګټه اخستلی شوه؛ خو دا چې افغانان د فرصت څخه ګټه نه شي اخستلی نو دا ستونزمنه ده، چې له بحرانه د فرصت استفاده وکړي.
له بده مرغه په تېرو پنځو لسیزو کې د نړۍوالو او سیمه ییزو رقابتونو په برخه اخستنه کې افغانانو څه ګټه نه ده کړې او په راتلونکې کې به یې هم ونه کړي.
یادونه: پورته لیکنه د لیکوال نظر څرګندوي، افغانستان انټرنشنل - پښتو د یوې بې پرې رسنۍ په توګه د لیکوالو نظر ته درناوی لري.
د کاناډايي رسنیو د راپور له مخې؛ هغه سپین پوستي کاناډايي ملتپال چې په قصدي توګه یې په ۲۰۲۱ کال کې د یوې مسلمانې کورنۍ څلور غړي اول تښتولي او بیا وژلي وو، د پنجشنبې په ورځ په عمري بند محکوم شو. نومړی د ۲۵ کلونو لپاره په هېڅ ډول د ازادیدو کوم چانس نه لري.
۲۳ کلن ناتانیل ویلټمن په تېر نومبر میاشت کې د هغه برید لومړی درجه قاتل وپیژندل شو، چې کاناډا ته یې ټکان ورکړی و. هغه د دې پریکړې په اړه کوم د پام وړ غبرګون نه دی ښودلی.
د دغې قضیې قاضي ویلي، چې د ویلټمن برید یو ترهګریز عمل و؛ دا لومړی ځل دی، چې دا اصطلاح د سپین پوستو ملتپالو د تاوتریخوالي لپاره کارول کیږي.
ویلټمن د ۲۰۲۱ کال په جون میاشت کې خپل پک اپ موټر د کاناډا د پلازمنیې اونټاریو په لندن ښار د پاکستاني اصله افضل کورنۍ پر پنجه غړو ور وخېژاوه. دغه کورنۍ له ماښامنۍ وروسته د قدم وهلو لپاره راوتلې وه.
په وژل شویو کسانو کې ۴۶ کلن سلمان افضل، د هغه ۴۴ کلنه مېرمن مدیحه سلمان، ۱۵ کلنه لور یومنه او د سلمان ۷۴ کلنه مور طلعت شامل وو.
د سلمان افضل او مدیحې نهه کلن ځوی په دغه برید کې سخت تپي شوی و. له برید لږ وروسته ویلټمن وویل: "ما دا برید کړی، ما دغه کسان ووژل."
ویلټمن د وژنې په تور د ذهني ناروغیو له امله په لومړي سر کې پړ نه و بلل شوی.
خو د محکمې قاضي ریني پومیرانس د پنج شنبې په ورځ ویلي: "زه د مجرم کړنې تروریستي عمل ګڼم."