پاکستاني رسنیو راپور ورکړی چې د خیبر پښتونخوا په مردان کې د امنیتي ځواکونو د عملیاتو پر مهال د ټي ټي پي وسله والې ډلې دوه جګپوړی قوماندانان وژل شوي دي. د رسنیو د معلوماتو له مخې د عملیاتو پر مهال په ډزو کې د پاکستاني پولیسو یو افسر هم وژل شوی او څلور پولیس ټپیان دي.
پاکستاني رسنیو د سې شنبې ورځ د (کب اتمه) خبر خپور کړی چې د پاکستاني امنیتي ځواکونو د پلټنې په عملیاتو کې د تحریک طالبان پاکستان یو قوماندان حسن قادر یوسفزی چې په محسن قادر مشهور و او د هغه وراره عباس چې په عیسی مشهور و، وژل شوي دي.
د سرچینو د معلوماتو له مخې دغه عملیات تېره شپه د ځايي وخت په درې بجې د خیبر پښتونخوا د مردان په کاټلنګ سیمه کې ترسره شوي چې په کې د ځايي پولیسو یو افسر هم وژل شوی او څلور پولیس ټپیان دي.
پاکستاني رسنیو د امنیتي سرچینو په حواله لیکلي چې د ټي ټي پي دغه قوماندان له دې وړاندې د پاکستان په پوځ کې دنده لرله چې په ۲۰۱۰ کال کې له ټي ټي پي وسله والې ډلې سره یو ځای شوی و.
سرچینو وړاندې ویلي چې نوموړی د بم جوړولو ماهر و او په سیمه کې یې په هدفي او د پولیسو په وژلو کې لاس درلود.
پاکستاني رسنیو د امنیتي سرچینو له قوله زیاته کړې چې دغه عملیات یې د استخباراتي معلوماتو پر بنسټ پیل کړي و چې غوښتل یې د ټي ټي پي دغه مهم قوماندانان ژوندي ونیسي خو د هغوی له مقاومت وروسته هغوی ووژل شول او تر څنګ یې پولیسو ته هم مرګ ژوبله واوښته.
نن سې شنبه د (کب اتمه) په خیبر پښتونخوا کې ازاد خبریال لال وزیر وايي چې د مجید په نوم دغه قومي مشر تېره شپه خپل کور ته نږدې په جومات کې نامعلومو کسانو په ډزو وژلی.
هغه له افغانستان انټرنشنل پښتو څانګې سره د خبرو پر مهال وويل چې له دغې پیښې وروسته د یادې سیمې د خلکو غوسه راپارېدلې او ټول کلیوال د وسلوالو په لټون پسې وتلي دي.
که څه هم چې په سیمه کې ځايي امنیتي ځواکونه د امنیت د ساتلو هڅې کوي خو د خیبرپښتونخوا ولسونه وايي چې حکومت یې د امنیت په راستو کې پاتې راغلی او د داسې پېښو له تکرار سره٬ سره د نورو پېښو مخه نه ده نیول شوې.
تر اوسه پورې د دغه برید مسوولیت چا نه دی منلی.
د خیبرپښتونخوا له وزیرستانه نیولې بیا تر ډېره اسمعیل خان پورې امنیتي وضعیت ورځ تر بلې ترینګلی کیږي، چې په کې په دې وروستیو کې په قومي مشرانو پسې بمي چاودنې او د هدفي وژنو پیښې ډیرې شوې دي.
