د افغانستان کرېکټ ملي لوبډله نن د اېرلنډ پر وړاندې خپله یوازینۍ ټېسټ لوبه پیلوي.
دغه لوبه نن د متحده عربي اماراتو په ابوظبي ښار کې د کابل په وخت ۱۱ بجې پیلېږي.

له اېرلنډ سره دغه لوبلړۍ په ټېسټ لوبې پیلیږي او له هغې وروسته به درې یو ورځنۍ او درې شل اوریزې لوبې ترسره شي.
تر دې یوه اونۍ وړاندې افغانستان د سریلانکا پر وړاندې لوبلړۍ کې له ۷ سیالیو څخه ۶ لوبې وبایللې.
اېرلنډ چې د ۲۰۲۳ کال له دوبي راهیسې یې کومه ټیسټ لوبه نه ده کړې، تر اوسه په دې فارمټ کې کومه بریا هم نه لري.
د افغانستان کرېکټ بورډ یوه ورځ وړاندې د دغې لوبې لپاره د لوبغاړو شپاړس کسیز نوملړ اعلان کړ.
په نوملړ کې د حشمت الله شهیدي، رحمت شاه، اکرام علي خېل، رحمان الله ګربز، ابراهیم ځدراڼ، نورعلي ځدراڼ، عبدالمالک، بهیر شاه، ناصر جمال، کریم جنت، خلیل ګربز، ظاهر خان، ضیا الرحمن اکبر، نجات مسعود، ابراهیم عبدالرحیمزی او د نوید ځدراڼ نومونه شامل دي.
د رحمان الله ګربز دا لومړۍ ټېسټ لوبه ده، چې په کې به ولوبېږي.
هغه تر دې وړاندې کومه ټېسټ لوبه نه وه کړې.

په دغه لوبه کې به د افغان لوبډلې لوبډلمشر حشمت الله شهیدي وي.