ذبیح الله مجاهد: امریکا نه د ښځو او ماشومانو حقونه پېژني او نه بشري حقونه

انتوني بلېنکن د سې شنبې په ورځ د افغان ښځو پر وړاندې د طالبانو پر محدودیتونو نیوکه وکړه او ویې ویل، چې د افغانستان خلک د طالبانو له دې سیاست سره مخالف دي.
مجاهد د طالبانو تر واک لاندې ملي راډیو ته ویلي، چې امریکا باید د غزې د جګړو په اړوند خپل مسوولیت ته پام وکړي.
نوموړي زیاته کړه، چې امریکا په غزه کې د اسراییل او د اسراییل له "جنایت" په ملاتړ وښوده چې "نه بشري حقونه پیژني او نه د ښځو او ماشومانو حقونه."
ذبیح الله مجاهد امریکا د فلسطینیانو په وژنه تورنه کړه.
د طالبانو ویاند دغه راز ویلي: "دا د امریکا اصلي څېره ده."
د امريکا د بهرنيو چارو وزير په واشنګټن کې د "افغان ښځو د اقتصادي پياوړتيا نوښت" په غونډه کې د افغان ښځو پر وړاندې د طالبانو پر ځپونکو سياستونو نيوکه وکړه او زیاته یې کړه، چې د افغانستان ٨٥ سلنه خلک د طالبانو له دغو بنديزونو سره مخالف دي.
انتوني بلېنکن ویلي، چې طالبان له اقتصادي برخو څخه د ښځو په لیرې کولو سره دې هېواد ته زیان رسوي.
ښاغلي بلېنکن د طالبانو دغه کړنه د افغانستان د دوامدار پرمختګ پر وړاندې خنډ وباله.
د امریکا د بهرنیو چارو وزیر ویلي، چې د افغانستان ۸۵ سلنه خلک د طالبانو له خوا پر ښځو او نجونو د لګول شویو بندیزونو مخالف دي او دوی غواړي چې ښځې زده کړو ته مساوي لاسرسی ولري.