په بدخشان کې د غره ښویېدنې له امله ۵ کسان ټپیان شوي دي
د طالبانو تر کنټرول لاندې باختر اژانس نن (د کب ۱۱مه) په اېکس پاڼه خبر ورکړی، چې د بدخشان د راغستان ولسوالۍ په نوشار کلي کې د غره ښويېدنې له امله يو کور ويجاړ شوی او پنځه تنه هم په کې ټپيان شوي دي.
ورته مهال تېره ورځ په هلمند کې ځايي طالب چارواکو ویلي وو، چې د سختو ورښتونو او سېلابونو راوتو له امله د ښځو او ماشومانو په ګډون شپږ تنو ته مرګ ژوبله اوښتې ده.
په هلمند کې د طالبانو د اطلاعات او کلتور رییس حافظ راشد ویلي و، چې وړمه شپه د هلمند د ناوې ولسوالۍ د خرابې د پوټیانو په سیمه کې د ورښتونو له امله د یوه کور چت غورځېدلی چې له امله یې څلور کسان مړه شوي دي.
نوموړی وايي، په دغه پېښه کې د یوې کورنۍ د دوو ماشومانو او یوې ښځې په ګډون څلور تنه مړه شوي دي.
تېره اوونۍ په نورستان کې هم ورته پېښه کې ۲۰ کسان مړه او دوه تنه ټپيان شوي وو.
د افغانستان په بېلابېلو ولایتونو کې د ورښتونو نوې څپې ډېر څاروي هم تلف کړي دي او په ډېریو برخو کې د سېلابونو د راوتو اټکل هم شوی دی.