مجاهد: د سړې هوا له امله د څارویو د تلف کېدو د مخنیوي په موخه د مرستو رسولو کمیټه جوړه شوه

په افغانستان کې د وروستیو واورو بارانونو له امله په هرات، فاریاب، بادغیس، سمنګان، جوزجان او غور ولایتونو کې زرګونه څاروي د سړې هوا، واښو او د څارویو د نورو خوراکي توکو د نشتوالي له کبله له منځه تللي او مالدارانو ته یې درانه مالي زیانونه اړولي دي.
ذبیح الله مجاهد په اېکس پاڼه لیکلي، د طالبانو رییس الوزرا په هغې بېړنۍ ناسته کې چې د اړونده وزارتونو سره یې کړې د دغو مالدارانو سره د مرستو په پار یې یوه خانګړې کمېټه جوړه کړې او د اوس لپاره یې پنځوس مېلیونه افغانۍ بودجه هم دغه کار ته بېله کړې ده.
مجاهد زیاتوي، چې دغه کمېټه به سیمې ته د څارویو خوراکي توکي رسوي، د هغوی د تودو ساتلو لپاره به اسانتیاوې برابروي، د لارو د خلاصون په اړه به ګامونه اخلي او په دې اړوند به نور امکانات هم په پام کې نیسي.
په افغانستان کې د څو کلنې وچکالۍ له امله د دغه هېواد څاروي هم کم شوي او له دې امله یې مالدارانو ته سخت زیانونه هم اړولي دي.
په افغانستان کې که له یوې خوا د وروستیو وارو بارانونو ورېدلو یو شمېر خلک د وچکالۍ د ختمېدو په اړه ډاډمن او هیله‌من کړي؛ خو له بل پلوه یې د ځینو ولایتونو مالدارانو ته زیانونه هم اړولي دي.