د نارنج ګل سږنۍ مشاعره د جلال اباد په سراج العمارت بڼ کې جوړه شوې وه؛خو د تېر په څېر هومره پرتمینه نه وه. دغه دودیزه مشاعره چې له لسیزو وړاندې په جلال اباد ښار کې جوړېږي د لرې او کوزې پښتونخوا شاعران او لیکوالان په کې برخه اخلي؛ خو سږنی کال په کې هومره شاعرانو برخه نه وه اخیستې.
د مشاعرې ځینو برخهوالو افغانستان انټرنشل پښتو ته وویل، چې پخوا به په دغو مشاعرو کې ګڼو شاعرانو د طنزیه شعرونو په ویلو سره د زړه بړاس اېستل؛ خو اوس طالبان نه خلکو ته د تنقید اجازه ورکوي او نه هم د هغوی د طنزیه شعرونو د اورېدو زغم لري.
د ننګرهار ولایت یو شاعر د نوم نه ښودلو په شرط افغانستان انټرنشنل پشتو ته وویل، نن سبا ګڼ شاعران له وېرې خپل شعرونه له خلکو سره نه شي شریکولای.
نوموړی وایي: د عزت الله ځواب جرم څه و، چې نن سبا د زندان د تورو تمبو شا ته پروت دی او کورنۍ یې بې برخلیکه ده، هغه یوازې د یو انتقادي شعر په وجه زنداني شوی او څوک یې اوس پاڼه هم نه اړوي؛ نو په دغسې حالاتو کې به شاعر څنګه شعر ولیکي.
نوموړي زیاته کړه: طالبان تل له شاعرانو غواړي چې د دوی په وصف کې ترانې ولیکي او د دوی د واکمن نظام لپاره مدحې ووایي چې دا کار د شعر او شاعرۍ سره ناروا ظلم دی او د شاعرانو په ژبه د مهرونو د لګولو مانا ورکوي او هر شاعر دې کار ته زړه نه ښه کوي.
د نارنج ګل مشاعره له نیمې پېړۍ را په دې خوا هر کال په جلال اباد ښار کې جوړېږي او دغه دوديزه ملي مشاعره د شاعرانو د يوځای کېدو او د شعر مينهوالو ته د تفریح لپاره جوړېږي چې هر کال ورته د افغانستان له بېلابېلو ولایتونو او خیبر پښتونخوا او بلوچستان شاعران هم وربلل کېږي.
له نارنج ګل مشاعرې وروسته په افغانستان کې د مڼې ګل، سنځل ګل، انار ګل، نښتر ګل، بادام ګل او نورو نومونو مشاعرې په بېلابېلو ولایتونو کې جوړېږي او د بېلابېلو ولایتونو شاعران په کې برخه اخلي.