پاکستاني سناتور مشاهد حسین سید ویلي، چې د ترهګرو بریدونو په ځواب کې له افغانستان سره پر ډیورنډ کرښه د لارو تړل لویه تېروتنه ده. هغه د امنیتي تحقیقاتو او څېړنو مرکز کې وویل، چې له سیاست د سوداګرۍ جلا کول د دواړو هېوادونو د ثبات او سیمه ییز اتصال لپاره اړین دي.
سناتور مشاهد حسین سید د سې شنبې په ورځ په اسلام اباد کې یوې خبري غونډې ته په وینا کې د پاکستان او افغانستان ترمنځ د فرضي کرښې د تړلو مخالفت وکړ او ویې ویل، چې د لارو د تړلو له امله د خپلمنځي سوداګرۍ دا د پام وړ منفي بدلون راغلی دی.
د ښاغلي حسین په وینا؛ له افغانستان سره د پاکستان د لارو په تړلو د ایران او افغانستان تر منځ د سوداګرۍ حجم د لومړي ځل لپاره د افغانستان او پاکستان له خپلمنځي سوداګرۍ لوړ شوی دی.
د پاکستان د مشرانو جرګې دغه غړي د ناقانونه افغان کډوالو د بېرته ستنېدو په اړه وړاندیز وکړ، چې هغو افغانانو ته چې په پاکستان کې زېږېدلي دي باید تابعیت ورکړل شي؛ څو له محرومیت سره مخ نه شي.
ښاغلي سید د خپلو خبرو په یوه برخه کې له طالبانو سره د ځینو هېوادونو تعاملاتو ته په اشارې سره وویل، چین او لوېدیځ دوحې ته د امریکا د ځانګړي استازي ټام ویسټ په لېږلو او له طالبانو سره په لیدنه، هغوی په عملي توګه د افغانستان د اصلي واکمنانو په توګه په رسمیت پېژندلي دي.
هغه زیاته کړه، په داسې حال کې چې هند هم ورته کړنلاره تعقیب کړې، روسیه هم د طالبانو په رسمیت پېژندلو کې د چین د اقدام ملاتړ کوي.
د پاکستان د مشرانو جرګې د دفاعي چارو د کمېټې د مشر په وینا؛ روسیه په دې برخه کې له قانوني خنډونو سره مخ ده ځکه چې طالبان لا هم د یوه ترهګر سازمان په توګه پیژني.
دغه پاکستانی سناتور په داسې حال له افغانستان سره د لارو پر پرانیستو تینګار کوي چې ورځ د طالبانو د ننګرهار د اطلاعاتو او فرهنګ رييس وويل، پاکستان د تورخم دروازه د پاسپورټ او ويزې پرته ناروغانو پر مخ تړلې ده.
