د روسیې ولسمشر خبرداری ورکړی چې که د دغه هېواد حاکمیت له ګواښ سره مخ شي، مسکو چمتو دی چې اټومي وسلې وکاروي. ولادیمیر پوتین د ریانووستي خبری اژانس ته وویل چې دی فکر نه کوي چې د اټومي جګړې د ترسره کولو لپاره بیړه لري، خو مسکو دې ته چمتو دی.
د روسیې ولسمشر ټینګار کړی، چې مسکو له تخنیکي پلوه د اټومي وسلو کارولو ته چمتو دی.
پوتین ویلي، که امریکا خپل ځواکونه په روسیه یا اوکراین کې ځای پر ځای کړي، مسکو به یې لاسوهنه وګڼي.
هغه څرګنده کړه چې د اټومي وسلو کارول د کرملین په اټومي اصولو کې تشریح شوي او هغه شرایط مشخص کوي چې مسکو کولی شي دا وسلې وکاروي.
پوتین وویل چې وسلې د کارونې لپاره دي، خو «موږ خپل اصول ورته لرو.»
نوموړي دا هم ویلي، چې که امریکا اټومي ازموینې وکړي، ښايي روسیه هم ورته چاره ترسره کړي.
د روسیې ولسمشر زیاته کړه چې په اوکراین کې د اټومي وسلو کارولو ته هېڅکله اړتیا نه ده لیدل شوې.
